Вилоят ҳокими Нуралхан Кўшеров Саврон туманига хизмат ташрифи доирасида янги саноат минтақаларининг қурилиши билан яқиндан танишди.

Инфратузилма билан таъминланган индустриал майдонлар тадбиркорликни ривожлантириш билан бирга, маҳаллий аҳолини иш билан таъминлашда ҳам катта имкониятлар яратмоқда.

2024-2026 йилларда Саврон туманида 5та саноат минтақасини барпо этиш режаланган. Хусусан, Қорачиқ, Ясси, Югнак, Чўрноқ ва Учқайиқ қишлоқ округларида 55 гектарга яқин майдон ажратилиб, 115та лойиҳани амалга ошириш кўзда тутилган. Ҳозирда 60 нафар тадбиркор билан меморандум имзоланиб, уларнинг 30 нафари қурилиш ишларини бошлаб юборган. Вилоят раҳбари Нуралхан Кўшеров таъкидлаганидек, мазкур лойиҳалар нафақат тадбиркорликни ривожлантиради, балки маҳаллий аҳоли учун барқарор даромад манбаини яратади.

– Индустриал минтақага сармоя жалб этиш, тадбиркорлик фаоллигини ошириш, меҳнат бозорини қўллаб-қувватлашда самарали воситадир. Биз тадбиркорлар учун зарур инфратузилмани яратиб, маҳсулотларни бир марказда жамлаш орқали уларнинг маҳсулоти бозорга киришини енгиллаштирамиз. Бу эса Туркистон вилояти иқтисодиёти келажагига қуйилган сармоядир, – деди Нуралхан Кўшеров.

Ташриф давомида вилоят ҳокими дастлаб Енбекши Дихан қишлоғидаги «Иасси» индустриал минтақасида бўлди. Бу ерда 9 гектар майдонда 24та лойиҳа амалга оширилади. Шу жумладан, 16 нафар тадбиркор лойиҳа бўйича иш бошлаган. Мазкур минтақада мебель, тикувчилик, йўл белгилари, бўёқ, қоғоз, пластик, ярим тайёр озиқ-овқат маҳсулотлари ва қурилиш материаллари ишлаб чиқариш цехлари ишга туширилади. Умумий сармоя ҳажми 6,3 миллиард тенге бўлиб, 600дан зиёд иш ўрни яратилади. 10 гектар майдонда жойлашган «Қорачиқ» саноат минтақасида 20та лойиҳа амалга оширилади. 12 нафар тадбиркор қурилиш ишларини бошлаб юборган. 

Ушбу минтақада эшик-дераза, вентиляция қувурлари, резина қопламалар, пластик идишлар, тикувчилик ва жиҳоз ишлаб чиқариш цехлари очилади. Лойиҳанинг умумий қиймати – 4,5 млрд. тенге, иш ўринлари – 170. Югнак қишлоқ округида жойлашган «MinPromKaz» МЧБ қуруқ қурилиш аралашмаларини ишлаб чиқаришга ихтисослашган. 5 гектар майдонда қурилиш-монтаж ишлари олиб борилмоқда. Корхона ишга туширилгач, йилига 300 тонна маҳсулот ишлаб чиқариб, 300 киши доимий иш билан таъминланади.