Туркистон шаҳрида халқаро даражадаги  «Voice of Turan – 2025» Қозоқ қўшиқлари фестивали ўтди. Икки кун давом этган мусиқа байрамида дунёнинг 17 давлатидан ташриф буюрган иқтидорли хонандалар иштирок этиб, Қозоғистоннинг бой мусиқий меросини намоён этдилар. 

Фестивалда Қирғизистон, Ўзбекистон, Озарбайжон, Татаристон, Бошқирдистон, Туркия, Тува, Тунис, Португалия, Руминия, Куба, Италия, Жанубий Африка, Сан-Марино, Эквадор, Индонезия ва Болгария каби мамлакатлардан келган санъаткорлар қозоқ мусиқасининг ёрқин намуналарини ижро этдилар. Улар Ақан сери, Шамши Қалдаяқов, Кенес Дуйсекеев ва Нурғиса Тлендиев каби таниқли бастакорларнинг асарларини тингловчиларга    жонли равишда етказдилар.

Тадбирни баҳолаш жараёнида Қозоғистоннинг машҳур санъат усталари, бастакорлар ва эстрада юлдузлари иштирок этди. 

Фестивалнинг энг юксак  мукофоти – Бош соврин  италиялик иқтидорли хонанда Винченцо Кантьеллога насиб этди.

Қўшиқ байрами нафақат Туркистонни мусиқа садоларига тўлдирди, балки қозоқ қўшиқлари салоҳияти чегара билмас куч эканини бутун дунёга яна бир карра  намоён этди. Мусиқий санъат, маданият ва маънавият байрами сифатида у миллий ва халқаро майдонда юксак ижобий таассурот қолдирди.

Ушбу муҳим маданий лойиҳа Туркистон шаҳрига вилоят маркази мақоми берилганига 7 йил тўлиши муносабати билан Туркистон вилояти ҳокимлиги шафелигида,  «Халқ ижоди ва маданият маркази» ташаббуси билан ташкил этилди.