Сайрам туманининг Манкент қишлоғида фаолият юритувчи “Ал Форобий УЎТМ” МЧБга ҚР Парламент Мажлиси ҳамда “AMANAT” партияси раиси Ерлан Қўшанов ташриф буюрди. Қозоғистонда хизмат кўрсатган қурувчи, Шимкент шаҳри ҳамда Сайрам туманининг фахрий фуқароси, “Парасат” ва “Құрмет” орденлари соҳиби Низомхон Сулаймонов меҳмонга Сайрам туманида барпо этган еттита мактаб фаолияти ҳақида сўзлаб берди.

Жумладан, бугунги кунда Қорабулоқ қишлоғида 2020 йилдан буён фаолият юритаётган “Сайрам”, Манкент ва Оқсувкент қишлоқларида 2022 йили барпо этилган “А. Навоий УЎТМ”, “А. Мўлдағулова УЎТМ”, “Ал Форобий УЎТМ”, “А. Яссавий УЎТМ”, “Д. Қўнаев УЎТМ” ва “М. Авезов УЎТМ” МЧБларда 4 мингдан зиёд ўқувчи таълим-тарбия олмоқда.

Е. Қўшанов мазкур таълим маскани фаолияти билан танишиб, ўқувчиларнинг пухта билим  олишлари учун яратилган шароитга юксак баҳо берди. 

– Хизмат сафаримизни Туркистон вилоятидан бошладик, – деди у мактаб жамоаси билан мулоқот чоғида. – Давлат раҳбари Қ. Тўқаев Яқинда Туркистон шаҳрида ўтган Миллий Қурултойда: “Адолатли Қозоғистонни адолатпарвар одамлар барпо этади”, деган эди. Низомхон аканинг бугунги кунда амалга ошираётган ишлари ушбу қанотли иборага мос ва ҳамоҳангдир. 

Ўзингиз гувоҳсиз, мамлакатимизда, айниқса, ёш авлод таълим-тарбиясига устувор аҳамият қаратилмоқда. Онам мактабда ўқитувчи бўлиб хизмат қилган. Педагог меҳнатининг машаққатларидан хабардорман, Иттифоқ даврида ўқитувчи юксак ҳурмат ва эътиборга сазовор бўлган. Хабарингиз бор, жорий йил “Педагог мақоми тўғрисида” Қонун қабул қилинди. Мақсад – устозларнинг жамиятдаги мавқеини юксалтириш.

Мажлис раиси Н. Сулаймоновнинг давлат-хусусий шериклиги доирасида амалга ошираётган бунёдкорлик фаолиятига юксак баҳо бериб, тадбиркорнинг ташаббуси бошқаларга ўрнак бўлиши зарурлигини таъкидлади. Шунингдек, у ўқитувчиларнинг маоши ошгани, бу меҳнат самарадорлигини юксалтириб, устозларнинг жамиятдаги мавқеи ҳамда обрў-эътиборини юксалтиришга таъсир кўрсатаётганини таъкидлади.

Муассаса ўқитувчилари ташриф учун Ерлан Жаханулига миннатдорчилик билдиришди. 

– Низамхон Сулаймон ўғли – қаҳрамонимиз, – деди “Арофат” мактаби” МЧБ директори Рўза Пак. У меценатнинг рафиқаси Арофат Воҳид қизи билан бамаслаҳат таълим соҳасини ривожлантириш борасида салмоқли ва хайрли ишларни амалга ошираётганини таъкидлади. 

Учрашув якунида Е. Қўшанов жамоанинг келгусидаги фаолиятига муваффақият тилаб, мультимедиа тахта ва кийим-кечаклар совға қилди.