Давлат раҳбари Қасим-Жўмарт Тўқаев 2025 йилни “Ишчи касблари йили” деб эълон қилди. Ушбу Фармон мамлакатимиздаги ишчи ва ўрта бўғин касбий мутахассислар тайёрлайдиган коллежларни жаҳон таълим тизимига янада яқинлаштирувчи муҳим қарордир. Бу борада маърифий саёҳат технологияси алоҳида аҳамиятга эга. Ушбу технология дунёдаги техник ва касбий таълим муассасалари ҳақида кенг кўламли маълумот олиш билан бирга, уни педагогик амалиётда қўллаш имконини беради. Ҳозирги кунда Д. Қўнаев номидаги аграр-техника коллежи халқаро андазаларга мослашган ҳолда рақобатбардош таълим муҳитини яратишда фаол иштирок этмоқда.

Маърифий саёҳатнинг мақсади – халқаро андазаларга асосланган тараққиёт концепцияси билан яқиндан танишувдир. Дарҳақиқат, инсон дунёни англар экан, шахс сифатида шаклланиб, маданий маконда ўзини-ўзи тушунишга эришади.

Ушбу технология бир неча босқичларни қамрайди. Биринчи босқич – рағбатлантирувчи ва йўналтирувчи қисм. Саёҳатга тайёргарлик унинг мавзуи ва ғоясини, тадқиқ этиладиган иншоотларни танлаш ва йўлланма яратишдан бошланади.

Илк саёҳатимиз – Франциянинг Лион шаҳрига бўлди. У жойда 47-“WorldSkills Lyon 2024” Халқаро чемпионатида иштирок этиб, тажриба алмашдик. Иккинчи – экспедиция босқичида саёҳатнинг ҳар бир манзили учун аниқ вазифалар белгиланди. Жумладан, борилган иншоотлар тадқиқ қилиниб, маълумотлар  тўпланди ва таҳлил қилинди. 

Маърифий саёҳат технологиясининг навбатдаги йўналиши Қозоғистондаги техник ва касбий таълим муассасалари учун дунёнинг энг йирик автомобил ишлаб чиқарувчи – “Mercedes-Benz” заводидаги ўқув ишлаб чиқариш маркази билан танишиш ва ҳамкорлик ўрнатишга бағишланган семинар бўлди. Тадбир Германия коллежлар уюшмаси ҳамкорлигида уюштирилди. “Тўртинчи саноат инқилоби” дунёвий жараёнларига тўлиқ мос келувчи ишлаб чиқариш базасидаги мазкур қайта тайёрлаш маркази меҳнат бозори талабларига мос ишчи касблари мутахассислари тайёрлаш бўйича дунёдаги нуфузли корхонадир.

Шу тариқа коллеж ўқувчилари ва ишлаб чиқариш усталари учун академик мобиллик доирасида халқаро меҳнат бозорига мослашишнинг иккинчи босқичи бошланди. Учинчи босқичда сафар якуни чиқарилиб, ижобий натижалар қайд этилди. Жумладан, Германиянинг коллежлар уюшмаси, Франциянинг “Академия де Париж”, Жанубий Кореянинг “Moson Korea University”, Ўзбекистоннинг “2-сонли  Вобкент политехникуми” ва “Бўка агротехника техникуми”, Қирғизистоннинг “28-сонли Қирғиз-Россия ҳунар-касб лицейи” муассасалари билан 6та халқаро ҳамкорлик меморандуми имзоланди.

Шунингдек, Париж таълим академиясининг қўллаб-қувватлаши билан “Қишлоқ хўжалигини механизациялаш” ва “Пайвандлаш иши” мутахассисликлари халқаро аккредитациядан ўтди. Коллеж талабалари Ақмўла, Астана, Кўкшетов, Жамбил вилоятида касбий маҳорат бўйича ўтган республика танловларида ҳам юқори натижаларга эришдилар. 

Келгусида коллежда ҳайдовчиларни тайёрлайдиган автомактаб, шунингдек, “Мол наслини сунъий танлаб, кўпайтириш”, “Сут маҳсулотларини қайта ишловчи” кичик корхоналарни очиш режаланмоқда.