Атоқли давлат арбоби, ижодида халқлар дўстлигини тараннум этган буюк мутафаккир ва шоир Мир Алишер Навоий ижодини чуқур ўрганиш орқали ўзбек тилининг бадиий хусусиятлари, туркий халқлар бирлигини тарғиб қилиш мақсадида вилоятимизда турли маданий-маърифий тадбирлар ташкил этилмоқда. 

Шулардан бири – Қозоғистон ўзбек этномаданият бирлашмалари «Дўстлик» ҳамжамияти, Ўзбекистон давлат хореография академияси, А. Навоий номли Тошкент Давлат ўзбек тили ва адабиёти университети, Ж. Ташенев номли университет ҳамкорлигида Шимкент шаҳридаги ҚХА биносида умумтаълим масканларининг 10- ва 11-синф ўқувчилари орасида ўтказилган “Навоий ўқишлари” халқаро кўрик-танлови. Қувонарлиси, унда иштирок этган 100-сонли умумтаълим мактабининг 10-«А» синф ўқувчиси Рўзаой Ғуломова юқори натижа кўрсатиб, фахрли І ўринни қўлга киритди. 

Рўзаой нафақат мактабимиз, балки туманимиз, республикамизнинг ишончини оқлади. Бу ўринда унинг устози, мактабимизнинг олий тоифали ўқитувчиси Дилфуза Ҳалимжонованинг меҳнатини алоҳида таъкидлаш жоиз. У Р. Ғуломовага 5 йилдан буён сабоқ бериб, шогирдида ўзбек тили ва адабиётига ўзгача меҳр уйғотди. 

Мактабимизнинг аълочи ўқувчиси Рўзаой Ғуломова келажакда етук мутахассис сифатида, ўзбек тилининг ривожига катта ҳисса қўшишига ишонамиз.