“Абай куни” арафасида унинг меросини чуқур ўрганган, келажак авлодга қимматли асарлар қолдирган Мекемтас Мирзахметулига ҳурмат-эҳтиром кўрсатилди.

Вилоят ҳокими ўринбосари Ертай Алтаев Тулкибош туманига хизмат сафари чоғида маданият бошқармаси бошлиғи Азимхан Қўйлибаев, туман ҳокими Нуржан Изтилеуов, вилоят “Фараб” кутубхонаси мудираси Жанат Шардарбековалар ҳамроҳлигида 97 ёшни қарши олган оқсоқолнинг уйига ташриф буюриб, табриклашди. Ҳаётини буюк Абай таълимотига бағишлаган Мекемтас Мирзахметули номзодлик ва докторлик илмий унвонларини ҳимоя қилган.

Кекса олимнинг дуосини олган вилоят ҳокими ўринбосари вилоят ҳудудида мафкуравий соҳада амалга оширилаётган тадбирлар ҳақида фикр билдириб, келгусида илм-фан ва маънавият соҳаларида амалга ошириладиган ишлар билан таништирди. Олим миллий ўзлик ва урф-одатларимиз, тарих ва маданиятимиз ҳақида фикр юритар экан, меҳмонларга Абай ҳақида ўзи ёзган китобларни туҳфа қилди.

Эслатиб ўтамиз, 2020 йилдан бошлаб Давлат раҳбари Қ. Тўқаевнинг ташаббуси билан 10 августда “Абай куни” нишонланади. Айнан шу куни буюк мутафаккир, атоқли шоир дунёга келган. Бу байрам юртимизда ҳар йили кенг нишонланиб, Абайнинг тафаккур ва маънавият чўққисига кўтарилган мероси тарғиб қилинади.

Буюк Абай ўз асарларида тинчлик ва осойишталик, эл-юрт манфаати учун яшаш каби умумбашарий қадриятларни, адолат ва поклик, ватанпарварлик, дўстлик ва садоқат, камтарлик каби инсоний фазилатларни тарғиб этган ва баркамол бадиий образларда мужассам этган улуғ мураббийдир.