2020 йилдан бошлаб мамлакатимизда Абай куни кенг нишонланмоқда. Шу муносабат билан Туркистон шаҳрида махсус тадбир уюштирилди. Унда вилоят ҳокими ўринбосари Ертай Алтаев, зиёлилар, кутубхоначилар, истеъдодли ўқувчилар иштирок этди.

Тадбир меҳмонлари дастлаб китоб кўргазмаси билан танишди. Шундан сўнг, вилоят ҳокимининг ўринбосари ва бир гуруҳ зиёлилар Абай ҳайкали пойига гулчамбар қўйишди.

Вилоят оқсоқоллар кенгаши раиси Жарилқасин Азиретбергенов Абай ҳикматларини ёшларга тарғиб қилиш зарурлигини таъкидлади. 

Ертай Кенжебекули тадбирнинг моҳиятига тўхталиб, жумладан шундай деди:

– Бугунги тадбир қозоқ маданияти ва адабиётида муҳим аҳамиятга эгадир. Буюк мутафаккир Абай Қунанбайулининг ижоди ва меҳнатларини улуғлаш – бурчимиздир. Ушбу кун “Абай ўқишлари” халқ акцияси, “Абай ҳикматлари” адабий челенджи, илмий анжуманлар ва абайшунос олимлар билан ижодий учрашувлар орқали кенгроқ тарғиб қилинади, – деди вилоят ҳокимининг ўринбосари.

Туркистон шаҳар “Болалар ва ўсмирлар маркази” тарбияланувчилари Абай ижодидан намуналар ўқиди. Қозоғистон Ёзувчилар уюшмасининг вилоят филиали раҳбари Айдар Сейдазим бошчилигидаги ижодкорлар шоирнинг шеърларидан ўқиб беришди.

Таъкидлаш жоизки, Абай Қунанбайулининг 179 йиллиги муносабати билан “Фараб” кутубхонаси “Абайни ўқи, ижро эт” мавзуида адабий тадбирлар ўн кунлигини бошлади.