Жорий йилда вилоятимизда 106,4 минг гектар майдонга пахта экилди. Тахминан 300 минг тонна ҳосил олиш режаланган. Мазкур масала вилоят ҳокими Дархан Сатибалди раислигида ўтган мажлисда муҳокама қилинди. Минтақа раҳбари пахтачиликда янги технология ва усулларни жорий этиш ишларини кучайтириш зарурлигини таъкидлади.

Маҳсулот сифатини ошириш мақсадида бу йил янги усулда 2,5 минг гектар майдонга ғўза экилди. Сувни тежаш технологияси самарадорлигини исботлади. У сув, электр қуввати, меҳнат захиралари ҳамда минерал ўғитларни тежаб, гектаридан 60-65 центнердан ҳосил олиш имконини берди. Бу вилоятнинг ўртача кўрсаткичидан 2,5 баравар юқори.

Қозоғистонда етиштирилган пахта толасининг сифати паст. Шу боис, у жаҳон бозорида талабга эга эмас. Янги технологияни жорий этиш нафақат ҳосилдорлик, балки пахта толасининг сифатини яхшилайди. Умуман, минтақада пахтачиликни ривожлантиришга доир бир неча пахта-тўқимачилик кластери барпо этилмоқда. Лойиҳани тўлиқ амалга ошириш натижасида пахта хомашёсининг аксарият қисми қайта ишланади ва пахта баҳосига қарамлик тўлиқ бартараф этилади.

Янги технологик усулнинг самарадорлиги исботланди –чигит тез илдиз ёйиб, ҳосил эрта пишиб етилади. Томчилатиб суғориш натижасида ҳосилдорлик камида икки бараварга ошади. Шу боис пахтакорлар янги инновациявий усулга ўтиш ниятида. Бу агросоҳага жўшқинлик беради. Шунингдек, вилоятда пахтани чуқур қайта ишлайдиган кўп соҳали мажмуалар ва корхоналар барпо этилиб, тайёр маҳсулотни экспортга чиқариш режаланмоқда. Шу билан бирга, юпқа матодан тикилган кийимлар ва юқори сифатли тўқимачилик буюмларини ишлаб чиқариш кўзда тутилган.