Жорий йилда туркистонлик деҳқонлар Хитой пахтасининг “60” навини экдилар. Бу турдаги пахтанинг ўзига хос хусусияти шундаки, унда тола кўп, чигит кам.

Жетисай туманида пахта теримига биринчилардан бўлиб “Айдар” деҳқон хўжалиги киришди. Бу йил у 14 гектар майдонда «оқ олтин» етиштириб, гектаридан ўртача 50 центнердан ҳосил олишни кўзламоқда. Агар агротехник тадбирлар тўғри бажарилса, мўл ҳосил олиш имконияти юқори.

– Жорий йилда оқар сув ва минерал ўғитлар билан боғлиқ масалалар ижобий ҳал қилинди, шу боис ҳосилдорлик кўнгилдагидек. Илгари “Султан”, “Мақтаарал”, “Бухоро” навларини экардик. Маҳсулот 20-25 центнерни ташкил этарди, – дейди хўжалик етакчиси Ербўл Айтуғанов.

Жорий йилда Жетисай туманидаги 79,3 минг гектар обикор ернинг 40,8 минг гектарида пахта етиштирилди. Вилоятда 200 тоннага яқин пахта териб олинди. Теримга 715та трактор ва 897та трактор-тиркама, 232та пахта териш машинаси сафарбар этилган.

Ўтган йили 122 минг тонналик пахта хирмонини кўтарган жетисайлик Пахтакорлар бу йил ҳам режани ортиғи билан бажариш ниятида. Боиси, маҳсулот сифатини ошириш ва сувни тежашда самарали технология сифатида эътироф этилган томчилатиб суғориш усули жорий йилнинг ўтган даврида 2 минг гектарга кўпайтирилди.