Туркистон шаҳридаги “Дўстлик уйи”да Қозоғистон халқи Ассамблеяси Оқсоқоллар кенгашининг республика мажлиси ўтди.

Тадбирда ҚХА раиси ўринбосари, ҚР Президенти Девони – ҚХА котибияти мудири Марат Азилханов, ҚР Маданият ҳамда ахборот вазирлиги Этнослараро муносабатларни ривожлантириш қўмитаси раиси Ғалим Шўйкин, Туркистон вилояти ижтимоий тараққиёт бошқармаси раҳбари Ерлан Кузембаев, вилоят “Ижтимоий тотувлик” ДКК раҳбари Элмира Жанғазиева ҳамда этносиёсий тадқиқотлар институти директори Талғат Қалиев, шунингдек, Оқсоқоллар кенгаши раислари ва аъзолари иштирок этди.

Учрашувда сўзга чиққан ҚХА раиси ўринбосари Марат Азилханов Қозоғистоннинг ҳар бир минтақасидан ташриф буюрган нуроний оқсоқолларнинг янги “Дўстлик уйи”даги учрашуви эзгуликдан нишон эканлигини таъкидлаб, ушбу иншоот барча туркистонликларнинг учрашувлар, маърифий суҳбатлар ўтказиладиган маънавият марказига айланишига ишонч билдирди.

– Оқсоқоллар кенгаши фаолияти давомида эзгу қадриятларни эъзозлашни ҳар бир фуқаронинг онгига сингдириб бориши бош вазифа ҳисобланади. Шунингдек, жамиятдаги беш ижтимоий йўналиш доирасида умуммиллий курашга сафарбарлик, Президент эълон қилган “Ишчи касблари йили” доирасида ҳар минтақада элга азиз меҳнат одамларини тарғиб этиш, ёшларга касбий йўналиш бериб, меҳнатсеварликка даъват этиш муҳим, – деди Марат Алмасули.

Ғалим Шўйкин ўз сўзида оқсоқолларнинг этнослараро соҳадаги давлат сиёсатини амалга оширишдаги ўрнига тўхталиб, уларнинг иштироки жамиятда тинчлик ва барқарорликни мустаҳкамлашга таъсир кўрсатишини таъкидлади.

Йиғилишда элимизнинг ҳар бир минтақасидан ташриф буюрган оқсоқоллар ёшларни ватанпарварлик руҳида тарбиялаш, эл мустаҳкамлигини ривожлантириш йўлида аҳолининг давлат тузилмалари вакиллари билан учрашувлари моҳияти ҳақида фикр-мулоҳазаларини билдириб, иш тажрибалари билан ўртоқлашди.

Умуман, минтақавий Оқсоқоллар кенгашининг вакиллари учрашувга ижобий баҳо бериб, бу каби тадбирлар келгусида ҳам анъанавий равишда ўтказилишини таклиф қилишди.