Қариялар куни муносабати билан Туркистон вилоятида 17-“Фаол узоқ умр” маркази очилди. Вилоят марказида дастлабки шундай иншоот икки йил муқаддам фойдаланишга топширилган эди.

“Ўтрор” мавзесидаги 2-сонли марказнинг очилиш маросимида иштирок этган вилоят ҳокими Дархан Сатибалди фахрийларни байрам билан табриклади.

– Сизларни бугунги байрам – Халқаро қариялар куни билан чин қалбимдан табриклайман! Қариялар қадр топган юртда меҳр-оқибат, қут-барака, тинчлик-хотиржамлик доимо барқарор бўлади. Кексанг бор – бараканг бор, дейди доно халқимиз. Албатта, ҳар бир киши ёши улуғларнинг бутун жамият, Ватан равнақи учун сарфлаган кучи, қилган меҳнатини дилдан англаб, уларнинг ҳурматини ҳамиша жойига қўя билмоғи шарт. Зеро, улар – жамиятимизнинг устунлари, оиламизнинг мустаҳкам таянчи, сизу бизнинг дуогўйларимиздир. Қариялар орасида “Фаол узоқ умр” марказларининг аҳамияти улкан. Бугунги кунда 15 туманда шундай марказлар очилиб, уларда 80 мингга яқин нафақадорга тегишли хизматлар кўрсатилмоқда. Бугун сизлар билан бирга муқаддас шаҳарда учинчи марказни ишга туширмоқдамиз. Мазкур халқаро байрам халқимизга хос бўлган ёши улуғларни эъзозлаш, уларнинг ҳурматини ўрнига қўйиш, панд-насиҳатларига қулоқ тутиш каби фазилатлар билан ҳамоҳангдир. Айниқса, истиқлол йилларида нуронийларга эътибор кучайиб, уларни қўллаб-қувватлаш масаласи алоҳида назоратга олинди. Барчангизга сиҳат-саломатлик, фаровонлик тилайман, – деди Дархан Сатибалди.

Марказнинг очилиш маросимида шаҳар оқсоқоллари дуо қилиб, давлат томонидан кўрсатилаётган кўмак учун миннатдорчилик билдиришди. Вилоят раҳбари янги марказда фахрийлар билан учрашув ўтказиб, уларнинг фикр-мулоҳазаларини тинглади. 

Бугунги кунда Туркистон шаҳрида 16 мингдан ортиқ нафақадор истиқомат қилади. Марказлар хизматидан ҳар куни 60-70 нафар, ойига 120-150 нафар нафақадор фойдаланмоқда. Марказ қарияларга ижтимоий-тиббий, руҳий, ҳуқуқий, маърифий ва бошқа ёрдамларни кўрсатади. Бу ерда отахону онахонларнинг ҳордиқ чиқариши, соғлом турмуш тарзини қарор топтириши учун барча шароитлар муҳайё.