Шимкент шаҳри, Сайрам даҳасидаги Шоюсуф Маҳмудов раҳбарлик қилаётган ҳашаматли «Пиёла» тамаддихонасида Шимкент шаҳар ўзбек этномаданият бирлашмаси раиси Тоҳир Нишонбоев, Ал-Форобий, Абай, Енбекши туманлари ЎЭМБ раислари Шуҳрат Рўзиметов, Илҳом Алимқулов, Баҳодир Мирзахметовлар “Халқаро қариялар куни” муносабати билан ҳаёти ва меҳнат фаолияти кўпларга ибрат, эътиборли ва таниқли отахонлардан бир гуруҳини кутиб олдилар.

Тадбирни Ш. Рўзиметов тантанали равишда очаркан, барчани улуғ айём билан табриклади.

Шаҳар ЎЭМБ раиси Т. Нишонбоев тадбир қатнашчиларини қутлар экан, куни кеча ҚР Президенти Қасим-Жўмарт Тўқаевнинг Туркистон шаҳрига келиб, бир неча иншоотлар очилишида иштирок этгани  ҳамда 28 сентябрь куни Туркистон вилояти ЎЭМБ томонидан “Ўзбек тили, маданияти ва анъаналари” кунини юксак савияда ўтказилганлигини таъкидлади ва 12 октябрь куни шаҳар марказий истироҳат боғида ўтадиган байрамга таклиф қилди.

Йиғилишда иштирок этган ҚР Парламентининг собиқ депутати, Жамоат арбоби Фахриддин Қоратоев Шуҳрат Рўзиметовга Ўзбекистон Республикаси консулининг ташаккурномасини тантанали равишда топшириб, келгуси фаолиятига муваффақиятлар тилади.

Сўзга чиққан бир гуруҳ фахрийлар шаҳар ва туман ўзбек этномаданият бирлашмаларининг фаолиятини юксак баҳолаб, келгуси ишларига омад тилади.