Сайрам туманининг Орис қишлоғидаги “Ас-салам” тўйхонасида Халқаро Қариялар куни, имконияти чекланганлар куни ҳамда Ўқитувчилар кунига бағишланган тантанали тадбир ўтди. Унга Орис, Кўлкент ва Қорабулоқ қишлоқларидан нуроний онахонлар ва отахонлар, фахрий устозлар ва имконияти чекланган ногиронлар таклиф қилиндилар.

Тажрибали устоз, таниқли сухандон Икром Аҳмедов дастлабки сўзни фахрий муаллим Жабборқул Серғалиев ҳамда тадбиркор Равшан Ҳайтеновларга берди. Улар барчани байрам билан қутлаб, тадбирни уюштиришда фаоллик кўрсатган Неъматжон Йўлдошев, Суннатилла Тошев ва Музаффар Йўлдошевга миннатдорчилик билдиришди. Саховатпарвар ҳомийлар туман бандлик ва ижтимоий дастурлар бўлимининг “Уйда хизмат кўрсатиш” муассасаси раҳбари Аблай Узоқов номидан ташаккурномалар топширди. 

Шундан сўнг сўз олган туман бандлик ва ижтимоий дастурлар бўлими раҳбарининг ўринбосари Ақилбай Жақипбеков, Қорабулоқ қишлоғи фахрийлар кенгаши раиси Эркин Юсупов, “ҚР кўзи ожизлар жамияти”нинг Сайрам туман филиали раиси Тўлқин Каримшиқов, жамоат арбоби, таниқли сухандон Ҳамроқул Давронбеков, “Уйда хизмат кўрсатиш” муассасаси ходимаси Куляш Дўсқараева, ҚР спорт устаси, имконияти чекланганлар орасида стол теннисидан Қозоғистоннинг 15 карра чемпиони Тўймурод Эшимовлар давра иштирокчиларини байрам билан қутлаб, эзгу тилакларини йўллашди.

Тадбирни ташкил қилишга салмоқли ҳисса қўшган Дониёр Ҳасантоев, Нажибулла Аллануров ва Илҳомжон Абдукаримовларга “ҚР кўзи ожизлар жамияти”нинг Сайрам туман филиали раиси Тўлқин Каримшиқов номидан ташаккурномалар топширилди.

Хонандалар Бекдилда Жўлшибеков, Иззатулла Аллануров, Беҳзод Ҳамидов ижросидаги куй-қўшиқлар даврага файз киритди. Тадбир ниҳоясида бир гуруҳ меҳнат фахрийлари, нуроний отахон ва онахонларга ҳомийларнинг совғалари тарқатилиб, кам таъминланган оилаларга озиқ-овқат саватчалари улашилди.