Туркистон шаҳрида 25 октябрь – Республика куни арафасида 2000 ўринга мўлжалланган илк “Бадастир мактаб” очилди. Давлат раҳбари Қасим-Жўмарт Тўқаевнинг топшириғига кўра, барпо этилган таълим масканининг тақдимотида вилоят ҳокими Дархан Сатибалди ҳамда таълим соҳасининг фахрийлари иштирок этди.

– Давлат раҳбарининг ташаббуси билан бугунги кунда мамлакатимизда “Бадастир мактаб” лойиҳаси доирасида замонавий мактаблар барпо этилмоқда. Ушбу ташаббус хароба ҳамда уч навбатли мактаблар масаласини ҳал қилиб, ўқувчи ўринлари танқислигини бартараф этмоқда. Жорий йил вилоятда 17800 ўринли 29та бадастир мактабнинг қурилиши олиб борилмоқда. Бугун унинг дастлабкисини очяпмиз. Мактаб оддий янги бино эмас. Бу – маърифий тараққиёт ва ўқувчи учун қулай шароитлар яратилган маскандир. Элимизнинг келажаги – билимли авлод қўлида. Уларнинг ўқишда илғор бўлиб, жамиятнинг барча соҳаларида юксак довонларни забт этишига тилакдошман. Янги илм маскани муборак бўлсин!, – деди Дархан Сатибалди.

Туркистон шаҳрининг “Янги шаҳар” ҳудудида барпо этилган 4 қаватли билим ўчоғида физика, кимё, биология ҳамда робототехника хоналари замонавий ускуналар билан жиҳозланган. Ўқувчиларнинг ҳар томонлама ривожланиши учун мактабда спорт заллари, устахона, лаборатория ва ҳордиқ масканлари мавжуд. Юқори тезликдаги интернет тармоғига уланган. Бошланғич ва юқори синф ўқувчилари алоҳида хоналарда билим олишади.