Бундан икки йил муқаддам ҚР Маориф вазири Ғ. Бейсембаев ташаббуси билан қишлоқ мактаблари орасида фан олимпиадаларини алоҳида ўтказиш йўлга қўйилган эди. Жорий йилда қишлоқ мактаблари орасида фан олимпиадаларининг математика ва табиий фанлар йўналиши бўйича Кентов шаҳрига қарашли 11та қишлоқ мактабларидан фақат Қарноқдаги Маҳмуд Қошғарий номли мактаб-лицейнинг 5 нафар ўқувчиси республика босқичига йўлланма олди ва улардан 4 нафари совринли ўринларни қўлга киритди. Қишлоқ олимпиадасининг республика босқичида 1та олтин, 2та кумуш ва 1та бронза медаль билан, устозлари ва халқимизни хушнуд қилган зукко ука-сингилларимиз ила ҳар биримиз ҳақли равишда фахрланамиз.

 Ҳа, бу кун кўҳна Қарноқ тарихига олтин ҳарфлар билан ёзилди. Қарноқдаги Маҳмуд Қошғарий номли мактаб-лицейнинг республика фан олимпиадаси ғолиб ва совриндорлари – Жасур Олимжонов – физика фани, олтин медаль, ўқитувчиси Акмал Орзуметов, Соҳибали Раимов – математика фани, кумуш медаль, ўқитувчиси Зоида Абдуллаева, Фахриддин Абдулазов – информатика фани, кумуш медаль, ўқитувчиси Бахтиёр Қурбонов, Дилафруз Бозорбоева – биология фани, бронза медаль, ўқитувчиси Дилфуза Алиева.

Ғолиб ва совриндор ўқувчилар, ўқитувчилар жамоаси, хусусан, Маҳмуд Қошғарий номли мактаб-лицей директори Артур Асаев ва директор муовини Турор  Маменовларни муваффақият билан муборакбод этамиз.