Вилоят ҳокими Н. Кўшеров АҚШлик сармоядор билан учрашиб, таълим соҳасини ривожлантиришга оид янги лойиҳани муҳокама қилди. 

Қозоғистонда туғилиб-ўсган Даяна Музан Туркистон вилоятида қозоқ тили ва адабиётини теран ўрганадиган болалар боғчаси ва мактаб очишга қаратилган ижтимоий лойиҳасини тақдим этди. Ушбу хусусий таълим даргоҳида тилларни ўрганиш, спорт ва мусиқага ошно этадиган истиқболли лойиҳа пайдо бўлади.

Истиқболли лойиҳа Европа таълим андазалари асосида ишлаб чиқилган. Музокаралар чоғида вилоят ҳокими лойиҳани амалга оширишда ҳар томонлама қўллаб-қувватлашга тайёр эканлигини айтди.

– Президент Қасим-Жўмарт Тўқаев раислигида ўтган Ҳукуматнинг Кенгайтирилган йиғилишида Давлат раҳбари таълим соҳасини ривожлантириш ва сармоя жалб қилиш борасидаги саъй-ҳаракатларни кучайтириш зарурлигини таъкидлади. Хизмат доирасида турли мамлакатлар сармоядорлари билан учрашиб турамиз. Минтақамизда таълим сифатини оширишга устувор аҳамият қаратилмоқда. Ўз навбатида, биз бу йўналишдаги ишларни расмиятчиликларсиз, имкон қадар тез ҳал қилиш учун куч-ғайратимизни аямаймиз, – деди Нуралхан Кўшеров.

Вилоят ҳокими  янги ўқув марказини барпо этиш учун ҳудуд танлашда аҳолининг зич жойлашуви, муҳандислик тармоқлар ва инфратузилмага уланиш имкониятларини инобатга олиш зарурлигини таъкидлади.