Сайрам туманида янги кичик туман қад ростлайди. Ушбу масала вилоят ҳокимлигида алоҳида муҳокама қилиниб, таклифлар ва режалар тингланди. Вилоят ҳокими Нуралхан Кўшеров қурилиш ишларини сифатли амалга ошириш зарурлигини таъкидлади.

– Ушбу ташаббусни қўллаб-қувватлаймиз. Туман ҳокими масъул бошқармалар билан ҳамкорликда ишни тизимли равишда бажариши жоиз. Биринчи навбатда инфратузилмани юритиш даркор. Ҳар бир қурилиш иншооти, иморатлар пухта, сифатли барпо этилиши жоиз, – деди Н. Кўшеров.

Сайрам тумани ҳокими Арман Сабитов янги кичик туманнинг режаси билан таништирди. Минтақадаги аҳоли тиғиз жойлашган ва тараққиёти юксалаётган туманда бошпана масаласи жуда муҳим. Қорасув қишлоғидаги 57 гектар ҳудудда янгидан барпо этиладиган кичик туманда 5 қаватли 47та уй-жой (2820 хонадон), қишлоқ маъмурияти биноси, бир кеча-кундузда 250 одамни қабул қиладиган замонавий шифохона, маданият уйи ва Ёшлар саройи, 600 ўринли замонавий янги мактаб, 280 ўринли болалар боғчаси, 6та тижорат иншооти ва истироҳат боғи барпо этиш режаланган. Шу билан бирга, масжид барпо этишга ҳам жой кўзда тутилган. Лойиҳадан мақсад – аҳолининг турмуш даражасини юксалтириб, бошпанага эҳтиёжини камайтириш. Туман ҳокимлиги томонидан ушбу иншоотларни муҳандислик-коммуникация тизимлари билан таъминлаш борасида лойиҳа-смета ҳужжатлари тайёрланган.