Мамлакатимиз пойтахти Астана шаҳрида Осиёда ҳамкорлик ва ишонч чоралари бўйича кенгаш (ОҲИЧК) штаб-квартираси ўз фаолиятини бошлади. Мазкур муҳим сиёсий воқеа муносабати билан ташкил этилган тантанали маросимда Қозоғистон Республикаси Президенти Қасим-Жўмарт Тўқаев ва ОҲИЧК Бош котиби Қайрат Сарибай иштирок этди.

Президент тантанали тадбирда сўзга чиқиб, мамлакат дипломатия соҳаси ходимлари ва фахрийларини касб байрами билан самимий муборакбод этди. Давлат раҳбари ўз нутқида аждодларимиздан мерос бўлиб қолган бағрикенглик ва тинчликпарварлик анъаналари ҳақида алоҳида таъкидлаб ўтди.

– Аждодларимиз асрлар давомида «дашт дипломатияси» асосида ҳаёт кечирган. Халқимизнинг бағрикенглик фазилати туфайли Буюк Даштда тинчлик ва тотувлик намунаси шаклланган. Бу қадимий тамойил ташқи сиёсатимизнинг мустаҳкам пойдевори сифатида хизмат қилади, – деди Қ. Тўқаев.

Президент ОҲИЧК штаб-квартираси очилишини тарихий воқеа сифатида қайд этар экан, Қозоғистоннинг ушбу ташкилотни ташкил этиш ташаббусини илгари сурганига 30 йилдан зиёд вақт ўтганини таъкидлади. Бугунги кунда ОҲИЧК Осиё аҳолисининг 90 фоизини, жаҳон аҳолисининг ярмидан кўпроғини қамраб олган нуфузли тузилмага айланганига урғу берди.

– Биз бошиданоқ фақат ҳамкорлик, ўзаро англашув ва мулоқот орқали тинчлик ва тараққиётга эришиш мумкинлигини айтганмиз. Бугун, геосиёсий зиддиятлар авж олаётган пайтда, бу тамойил янада долзарб аҳамият касб этмоқда, – деди Давлат раҳбари.

Шунингдек, Қозоғистон Президенти халқаро ҳуқуқ асосларининг емирилиши ва баъзи кучларнинг ўзини қонунлардан устун деб ҳисоблаши бутун инсоният учун жиддий хавф эканлигини таъкидлади. Бу борада барча давлатлар БМТ Низоми ва халқаро ҳуқуқ қоидаларига қатъий риоя қилиши шарт эканлигини таъкидлади.

Қасим-Жўмарт Тўқаев мамлакатда амалга оширилаётган кенг қамровли сиёсий ва иқтисодий ислоҳотлар ҳақида ҳам сўз юритди. Қонун ва интизом устуворлиги, инсон ҳуқуқлари, сўз ва тинч намойишлар эркинлигини таъминлаш, сиёсий партиялар фаолияти учун шароит яратиш борасида амалга оширилган ишларга эътибор қаратилди.

 Президент энергетика, транспорт ва рақамли иқтисодиёт соҳаларидаги лойиҳалар, сунъий идрок ва инновациялар орқали рақобатбардошликни ошириш режалари ҳақида ҳам фикр билдирди. Хусусан, Қозоғистонда сунъий идрокни ривожлантириш бўйича махсус кенгаш ташкил этилгани ва яқин вақт ичида янги суперкомпьютер ишга туширилиши маълум қилинди.

Қишлоқ хўжалигини замонавийлаштириш, озиқ-овқат хавфсизлигини таъминлаш ва мамлакат иқтисодиётини ранг-баранглаштириш эса стратегик устувор йўналиш сифатида белгиланди.

Якуний сўзида Давлат раҳбари ОҲИЧКнинг атрофлича тараққиётига ҳисса қўшган барча давлатларга миннатдорчилик билдириб, Қозоғистоннинг яқин ҳамкори бўлган Озарбайжон давлатининг хизматларини алоҳида эътироф этди.