Бугунги кунда мамлакатимиз иқтисодий тараққиёти, жумладан, Туркистон вилоятида саноат, сайёҳлик ва қишлоқ хўжалигини ривожлантириш мақсадида кенг кўламли ишлар амалга оширилмоқда. Бу жараёнда яқин қўшни, дўст ва ҳамкор мамлакатлар билан ҳамкорлик алоқаларини мустаҳкамлаш муҳим ўрин тутади.

Куни кеча вилоят ҳокими Нуралхан Кўшеров ўзбекистонлик сармоядорлар билан учрашди.

«U-UMAX Group» компанияси вакиллари вилоятимизда савдо-иқтисодий ҳамкорликни йўлга қўйиш ва биргаликда истиқболли лойиҳаларни амалга ошириш ниятида эканликларини билдиришди.

–  Ўзбекистон биз учун нафақат қўшни, балки бир дард, бир орзу билан яшайдиган қардош мамлакат. Бугунги кунда икки давлат ўртасидаги муносабатлар барча соҳаларда, жумладан, иқтисодиётда ҳам янги босқичга кўтарилмоқда. Туркистон вилоятида сармоядорлар учун барча қулайликлар яратилган. Сизларнинг таклифларингизни кўриб чиқишга, биргаликда янги лойиҳаларни амалга оширишга тайёрмиз, – деди минтақа раҳбари.

Учрашувда ўзбекистонлик тадбиркорлар қурилиш, йўл, темир йўл ва бошқа соҳалар бўйича амалга оширилиши мумкин бўлган лойиҳалар ҳақида маълумот бериб, ҳамкорлик йўлларини муҳокама қилишди.

Маълумот ўрнида айтиш жоиз, ҳозирги кунда Туркистон вилоятида инфратузилма тармоқлари билан таъминланган 19та индустриал минтақа, 5та махсус иқтисодий минтақа  мавжуд. Уларда 52та корхона фаолият юритмоқда. Ҳозирда қўшимча равишда 195,4 миллиард тенгега  57та янги лойиҳа бўйича қурилиш ишлари олиб борилмоқда.

Ушбу учрашув, шубҳасиз, қардош мамлакатлар ўртасидаги дўстлик ва иқтисодий ҳамкорлик тараққиётига  янги суръат бағишлаши билан аҳамиятлидир.