Вилоятимизда ишлаб чиқариш ва фармацевтика соҳасини ривожлантиришга йўналтирилган йирик сармоявий лойиҳа амалга оширилмоқда. Саврон туманидаги “Turan” махсус иқтисодий минтақасига қарашли “Ораңғай” қўшимча иқтисодий ҳудудида “Orzax Central Asia” МЧБнинг биологик фаол қўшимчалар ишлаб чиқарувчи замонавий заводининг вақт капсуласи қўйилди.

Тадбирда сўзга чиққан вилоят ҳокими Нуралхан Кўшеров Давлат раҳбари Қасим-Жўмарт Тўқаевнинг иқтисодиётни ранг-баранглаштириш ва импорт ўрнини босувчи ишлаб чиқариш соҳаларини ривожлантириш борасидаги вазифаларни амалга ошириш йўналишида минтақада тизимли ишлар амалга оширилаётганини таъкидлади.

– Давлат раҳбарининг топшириғига мувофиқ, биз иқтисодиётни хомашё услубидан юз буриб, импорт ўрнини босувчи аниқ лойиҳаларни навбатма-навбат амалга оширмоқдамиз. Вилоятда пахта-тўқимачилик, гўшт, маккажўхори ва жиҳоз кластерлари ривожланиб, янги корхоналар очилди. Олиб борилган ишлар натижасида 176 миллиард тенгени ташкил қилувчи 31та лойиҳа ишга туширилди. Жорий йилда эса 280 миллиард тенгелик 39та лойиҳа ижроси таъминланмоқда. Таҳлил юритиб, вилоятимизда фармацевтика маҳсулотлари истеъмол бозорининг 100 миллиард тенгега яқини импортга тобе экани аниқланди. Давлат раҳбарининг Туркия Республикасига расмий сафари доирасида эришилган шартномалар натижасида бугун ушбу замонавий корхонанинг пойдевори қаланди. Лойиҳа тўлиқ ишга тушгач, 500 нафар маҳаллий аҳоли иш билан таъминланади. Компания раҳбари Алимўғлу Селман ва унинг жамоасига муваффақият тилайман, – деди Нуралхан Кўшеров.

“Orzax Central Asia” компанияси раҳбари Алимўғлу Селман Қозоғистонда, жумладан, Туркистон вилоятида сармоявий лойиҳани амалга оширишга ёрдам берган Қозоғистон ҳукуматига, минтақа раҳбариятига миннатдорчилик билдириб, завод қурилиши белгиланган муддатда тугатилишини таъкидлади. 

Лойиҳанинг умумий сармоявий қиймати 20,4 миллиард тенгени ташкил қилиб, 10 гектар ер ажратилган. Қурилиш ишлари 2026-2027 йилларда юритилади.