Сайрам туманининг Қарасу қишлоғидаги Жанақурилис ҳудудида жойлашган “Қарасу” спорт мажмуасида катталар ўртасида қозоқча кураш  бўйича “Туркістан барысы” вилоят саралаш турнири якунланди. Ғолиблар энди республика миқёсидаги  мусобақада вилоят шарафини ҳимоя қилади.

Мусобақада вилоятнинг туман ва шаҳарларидан 90 кг.дан юқори вазн тоифасидаги  сараланган 26 нафар полвон куч синашди. 

 Сайрам тумани ҳокими Мадияр Ўразалиев ҳамда Туркистон вилоят жисмоний тарбия ва спорт бошқармаси раҳбари Ғалимжан Худияров мусобақа очилишида иштирок этиб, спортчиларга омад тилади ва миллий спортни ривожлантиришга қўшаётган ҳиссалари учун миннатдорчилик билдирди.

Мусобақа якунига кўра, Саврон тумани  полвони Абдуғани Бибарис учинчи ўринга сазовор бўлди.

Финалда Чордара тумани полвони Қайсар Шамшидинов ва Сариоғоч тумани спортчиси Мейиржан Абдималиков ўзаро беллашди. Ҳал қилувчи баҳсда Қайсар Шамшидинов маҳорати ва кучини намоён этиб, рақибини мағлуб этди ҳамда “Түркістан барысы – 2026” унвонига сазовор бўлди.

Ғолибга махсус камар ва 500 минг тенгелик сертификат топширилди. Иккинчи ўрин соҳиби 300 минг, учинчи ўрин соҳиби эса 200 минг тенгелик сертификат соҳиби бўлишди.

Таъкидлаш жоиз, вилоят саралаш турнирида биринчи ва иккинчи ўринни қўлга киритган Қайсар Шамшидинов ҳамда Мейиржан Абдималиков Астана шаҳрида ўтадиган республика турнирида  вилоят шарафини ҳимоя қилади.