Вилоят ҳудудий сайлов комиссияси тасдиқлаган чора-тадбирлар режасига мувофиқ, 17та туман ва шаҳар ҳудудий сайлов комиссиялари ҳамда 952та участка сайлов комиссияси аъзолари учун махсус ўқув машғулотлари ташкил этилмоқда.

Тадбирнинг асосий мақсади – сайлов комиссиялари аъзоларининг касбий тайёрлигини такомиллаштириш, сайлов қонунчилигини қўллашда узвийлигини таъминлаш, шунингдек, сайлов жараёнини ташкил этишдаги долзарб масалалар юзасидан тажриба алмашишдан иборат.

Қурултой арафасида сайлов комиссиялари учун уч босқичли ўқитиш ва тест синовлари ўтказилиши режалаштирилган.

Дастлабки босқичда вилоят ҳудудий сайлов комиссиясининг етти нафар аъзоси ҳамда барча туман ва шаҳар ҳудудий сайлов комиссиялари раислари, уларнинг ўринбосарлари ва котиблари иштирокида Қурултой бўйича семинар-кенгашлар ташкил этилмоқда.

Иккинчи босқичда туман ва шаҳар ҳудудий сайлов комиссияларининг қолган аъзолари, ҳар бир ҳудудда участка сайлов комиссиялари раислари, уларнинг ўринбосарлари ва котиблари учун сайлов қонунчилиги талаблари бўйича семинарлар ҳамда турли вазиятли жараёнлар асосида амалий тренинглар ўтказилади.

Учинчи босқичда эса участка сайлов комиссияларининг қолган аъзоларини ўқитиш режаси бор.

Таъкидлаш жоизки, йил бошидан буён сайлов комиссиялари аъзолари учун жами 501та ўқув-семинари ташкил этилди. Шундан 163таси каскад усулида ўтказилган. Сайлов комиссиялари аъзолари тўлиқ қамраб олинган. Шунингдек, комиссия таркибига янгидан қабул қилинган 116 нафар аъзони ўқитиш ҳам алоҳида назоратга олинган.

Ўқув машғулотлари вазиятли кейслар, “савол-жавоб” викториналари ҳамда жамоавий балл тўплашга асосланган “Gаmification” (ўйин технологиялари) усулларидан самарали фойдаланилмоқда.