Вилоятда 2026 йилнинг дастлабки олти ойида санитария-эпидемиологик аҳвол барқарор бўлганлиги ҳақида вилоят санитария-эпидемиология назорати департаменти раҳбари Нурбек Нишанов маълум қилди.

Вилоят ҳудудида йил аввалидан буён сил билан хасталанганлар сони 274дан 266га,  А вирусли гепатит 47дан 25га, сурункали гепатитлар 306дан 215га, ичак хасталиклари 148дан 107гача камайган. Қизамиқ билан 6 ойда 131 ҳолат рўйхатга олиниб, унинг 47таси лаборатория таҳлиллари орқали тасдиқланди. Касалликни юқтирган беморларнинг 27 нафари эмланмаган. Шу боис, 6-10 ойлик ва 2-4 ёшдаги 30 567 бола қўшимча эмланди. Конго-Қрим геморрогик безгаги бўйича вилоятда 8 ҳолат аниқланди. Касалликнинг асосий хавфи кана билан боғлиқ.

Эпидемия даврида хавфсизлик талабларига риоя қилмаган 10та тиббиёт муассасаси ходимларига маъмурий чора кўрилиб, 432,5 минг тенге жарима солинди. Минтақада ичимли сув масаласи ҳам назоратда. Ҳайвонларнинг тишлаб олиши ва қутуришнинг олдини олиш юзасидан 3 302 киши тиббий ёрдамга мурожаат қилган. Санитария-гигиена назорати давомида 42 иншоотнинг 29тасида текширув олиб борилган. Натижада, 20тасига жарима солиниб, уларнинг умумий қиймати 8,7 миллион тенгедан ошди, – деди соҳа раҳбари.

Департамент томонидан умумий овқатланиш соҳаси назоратидаги 1 513 иншоотнинг 714тасида, яъни 47 фоизида рухстаномалари йўқ. Шунингдек, савдо ўринларидан олинган 908 маҳсулот текширувдан ўтказилиб, 65таси техник регламент талабларига жавоб бермаслиги аниқланди.