Туркистон шаҳридаги «Конгресс-холл» мажмуасида Қурувчилар кунига бағишланган тантанали тадбир ўтди. Касб байрами муносабати билан ташкил этилган тадбирда Туркистон вилояти ҳокими Нуралхан Кўшеров, қурилиш соҳаси фахрийлари ва мутахассислари, шунингдек, ёш бинокорлар иштирок этди.

Тадбир доирасида махсус кўргазма ташкил этилиб, унда қурилиш соҳада қўлланиладиган замонавий техника ва асбоб-ускуналар, қурилиш материаллари ҳамда махсус жиҳозлар намойиш этилди. Вилоят ҳокими фахрий қурувчилар билан кўргазмани айланиб, тақдим этилган техника ва жиҳозлар билан танишди.

Тантанали тадбирда вилоят ҳокими сўзга чиқиб, қурилиш соҳаси мутахассисларини касб байрами билан самимий муборакбод этди.

– Сизларни касб байрамингиз – Қурувчилар куни билан чин қалбимдан табриклайман! Ҳамиша қурилиш соҳаси мамлакат тараққиётининг асосий тармоқларидан бири бўлиб келган. Давлат раҳбари Қасим-Жўмарт Тўқаев қурилиш соҳасини ривожлантиришга алоҳида эътибор қаратмоқда. Президентимиз уй-жой қурилиши ҳажмини ошириш билан бир қаторда, қурилиш сифати ва аҳоли хавфсизлигини таъминлашга устувор аҳамият бермоқда. Шунингдек, соҳани рақамлаштириш ва шаффофликни таъминлашни асосий вазифалардан бири сифатида белгилаб берган.

Туркистон вилоятида йирик қурилиш лойиҳалари босқичма-босқич амалга оширилиб, аҳоли фаровонлигига хизмат қилмоқда. Вилоятимизнинг тараққиёти, меъморий қиёфаси ва ободончилиги қурилиш соҳасининг жадал тараққиёти билан чамбарчас боғлиқ.

Жорий йилда Туркистон шаҳрида Туркий давлатлар ташкилотининг норасмий саммити ўтди. Унда Давлат раҳбари «Туркистонда мазкур учрашувни ўтказишдан мақсад – азалий юртда қардош давлатлар раҳбарлари билан учрашиш, қайта тикланган Туркистонни бутун дунёга танитиш», эканини алоҳида таъкидлади.

Туркистонни янада ободонлаштириш ва уни дунёга танитишда қурувчиларнинг ҳиссаси алоҳида аҳамиятга эга экани маълум. Шаҳарнинг рамзларидан бирига айланиб улгурган «Тайқазан» ва «Кийиз уй» мажмуалари бунинг яққол далилидир.

Қайси соҳани олмайлик, қурилишсиз уни ривожлантиришнинг иложи йўқ. Сизнинг ҳалол меҳнатингиз ва пешона терингиз эвазига вилоятимиз обод, аҳоли манзилларимиз янгиланиб, фуқаролар фаровонлиги юксалиб бормоқда. Бу – сизларнинг садоқатли меҳнатингиз самарасидир, – деди Нуралхан Кўшеров.

Тадбир давомида вилоят раҳбари қурилиш соҳасини ривожлантиришга муносиб ҳисса қўшган, касбий маҳорати билан танилган қатор соҳа мутахассисларини тақдирлади. Шунингдек, вилоят маслаҳати раиси Нурали Абишов ҳам қурилиш соҳасидаги самарали меҳнати билан ажралиб турган бир қатор мутахассисларга мукофотларни топширди.