Вилоят ҳокими Н. Кўшеров Саврон тумани аҳолиси билан учрашиб, очиқ мулоқот ўтказди. 

Учрашувда у Давлат раҳбарининг топшириқлари ижроси доирасида минтақада олиб борилаётган ишлар ва аҳоли турмуши фаровонлигини ошириш юзасидан амалга оширилаётган чора-тадбирлар ва туманнинг ижтимоий-иқтисодий тараққиёти кўрсаткичлари борасида ҳисобот берди. Шунингдек, келгуси лойиҳалар ва асосий вазифаларга тўхталди.

– Саврон туманининг ижтимоий-иқтисодий тараққиётининг асосий кўрсаткичларида ижобий ўсиш кузатилмоқда. 2026 йилнинг 6 ойи учун ялпи ҳудудий маҳсулот ҳажми 38,4 миллиард тенгени ташкил этди, бу ўтган йилнинг шу даврига нисбатан 36,7 фоизга кўп. Саноат ишлаб чиқариш ҳажми 14,3 миллиард тенгега етди, бу ҳам ўтган йилга нисбатан 19,9 фоизга ортиқ. 

Ушбу ютуқлар – энг аввало, туман аҳолисининг бирлиги, шунингдек, давлат дастурларининг тизимли амалга оширилиши туфайлидир. 

2025 йил якунларига кўра, Саврон тумани ижтимоий-иқтисодий тараққиёт кўрсаткичлари бўйича вилоятда биринчи ўринни эгаллаганди. 2026 йилнинг биринчи ярми натижаларига кўра у етакчи мавқеини сақлаб қолди ва яна биринчи ўринни эгаллади. Бу туманнинг барқарор ривожланиши, иқтисодиётнинг жадал ўсиши ва барча соҳалардагим тизимли ишлар далилидир. Ишончим комилки, келажакда биз ушбу ижобий суръатни сақлаб қолиш, аҳоли фаровонлигини юксалтириш, янги лойиҳаларни амалга ошириш ва туманни янги босқичга олиб чиқиш учун биргаликда ҳаракат қиламиз, – деди Нуралхан Кўшеров. 

2026 йилнинг 6 ойи давомида туман ишлаб чиқариш майдонларида жами 34 миллиард тенгелик 23та лойиҳа ишга туширилди, 894 фуқаро иш билан таъминланди.

Ўтган йили туманда 2та мактаб ва 1та тиклаш маркази фойдаланишга топширилди. Қишлоқ хўжалиги соҳасида 5000 бош молга мўлжалланган бўрдоқичилик майдони фойдаланишга топширилди. Бундан ташқари, 150 ўринли маданият уйи ва кутубхона, 1 спорт мажмуаси очилди, яна бир спорт мажмуасининг қурилиши йил охиригача якунланади. 

 Учрашувда аҳоли Ўқувчилар саройи қурилиши, қишлоқларни табиий газ, жамоат транспорти билан таъминлаш ва интернет сифатини яхшилаш каби масалаларни илгари суришди.

Вилоят раҳбари фуқароларни шахсий масалалари юзасидан қабул қилди. Унда бошпана олиш, тадбиркорлик билан шуғулланиш, таълим сифатига оид масалалар ҳақида айтилди.