2026-2027 ўқув йилида «Қозоғистон халқига» жамғармаси хайрия дастури доирасида абитуриентларни олий таълим муассасаларида ўқитиш учун 350та таълим грантини ажратди.

Таълим грантига қишлоқ аҳоли манзиллари, кичик ва моношаҳарлар мактабларининг 25 ёшгача бўлган (25 ёш ҳам қўшилади) битирувчилари қуйидаги тоифалардан бирига тегишли бўлган тақдирда даъвогар бўлишлари мумкин.

Етим болалар ва вояга етгунга қадар ота-она қарамоғисиз қолганлар, ногиронлиги бўлган шахслар, ногирон болаларни тарбиялаётган оилалар фарзандлари, шунингдек, ота-онаси ногирон абитуриентлар.

Таълим гранти соҳиби бўлган талабаларнинг ўқиш харажатлари йилига 1 миллион тенгегача қопланади. Шунингдек, билим олиш даврида ҳар ой 60 минг тенге миқдорида стипендия тайинланади. Стипендия ёзги таътилдан ташқари ҳолатда йилига 10 ой давомида тўланади.

Таълим грантига даъвогарлар рўйхатини олий таълим муассасаси ёки унинг филиали ЯМТдан ўтиб, ўқишга кириш учун белгиланган энг кам ўтиш балини тўплаган бўлғуси талабалар орасидан шакллантиради. Бунда ижодий имтиҳонлар натижалари ҳам ҳисобга олинади. Даъвогарлар рўйхати олий таълим муассасасининг танлов комиссияси  баённомаси билан расмийлаштирилади.

Стипендияни тўлаш тартиби ўзгарди

Ҳукумат давлат стипендияларини тайинлаш ва тўлаш қоидаларига ўзгартиришлар киритди. Энди тўловлар «Олий таълимнинг ягона дастури» орқали амалга оширилади. Шунингдек, талабалар, интернлар, магистрантлар, резидентлар ва докторантларга бериладиган стипендия миқдори ҳам янгиланади.

Ҳукуматнинг 2026 йил 31 июлдаги қарорига мувофиқ, давлат стипендияларини тўлаш жараёнида олий ва олий таълимдан кейинги таълим ташкилотлари, тўлов оператори ҳамда ваколатли давлат идоралари «Олий таълимнинг ягона дастури» орқали ўзаро ахборот алмашади.

Унга қандай маълумотлар киритилади?

Олий таълим муассасалари стипендия олувчилар ҳақидаги маълумотларни, жумладан, талабанинг ўқиш натижалари, олувчи тоифаси ва банк ҳисоб рақами маълумотларини ҳар ойнинг 12-санасидан кечиктирмай дастурга киритиши шарт.

Агар 12-сана дам олиш кунига тўғри келса, маълумот навбатги иш куни жўнатилади.

Стипендия қанча вақт ичида ўтказилади?

Оператор маълумотларни олгач,  беш иш куни ичида молиялаштириш учун ариза жўнатади. Фан ва олий таълим соҳасидаги ваколатли идора ёки бошқа масъул давлат идоралари маблағларни уч иш куни ичида операторга ўтказиши керак.

Талабалар ҳақидаги маълумотларнинг тўғрилиги учун таълим муассасалари масъул. Мабодо нотўғри маълумот туфайли стипендия ортиқча тўланган бўлса, таълим муассасаси ушбу маблағни операторга қайтаришни таъминлаши шарт.

Стипендия миқдори қанча?

Янги таҳрирда давлат стипендияларининг ойлик миқдори ҳам тасдиқланди:

Олий таълим муассасалари талабалари (педагогика ва соғликни сақлаш мутахассисликларидан ташқари) – 52 372 тенге;

Таълим ва соғликни сақлаш йўналишларидаги талабалар – 84 000 тенге;

Интернлар – 94 862 тенге;

Магистрантлар – 117 098 тенге;

Назарбаев университети магистрантлари – 218 750 тенге;

Резидент-шифокорлар ва «Соғликни сақлаш» йўналиши бўйича магистрантлар – 134 664 тенге;

Докторантлар – 262 500 тенге;

Тайёрлов бўлимлари тингловчилари – 44 516 тенге.

Ҳукумат қарори 2026 йил 15 августдан кучга киради.

ЯМТ – 2026: Битирувчиларнинг 76 фоизи белгиланган чегара балини тўплади

Қозоғистонда 2026 йилги асосий ЯМТда қарийб 233 минг абитуриент иштирок этди. Фан ва олий таълим вазирлиги маълумотларига кўра, уларнинг 76 фоизи белгиланган чегара балидан ўтиб, давлат таълим грантлари танловида иштирок этиш имкониятига эга бўлди.