Жетисай шаҳрида йиллар мобайнида аҳолини ташвишга солиб келган аянчли аҳволдаги уйлар муаммоси ниҳоят ҳал этилди. Жетисай тумани ҳокими Серик Мамитов М. Ауезов кўчасидаги янгилаш дастурига киритилган 27-рақамли ва 29-рақамли уйлар аҳолисига янги хонадонлар калитини топширди. 

Ярим асрдан зиёд тарихга эга икки қаватли мазкур уйлар 1954-1957 йилларда барпо этилган. Йиллар давомида мураккаб таъмирланмаган кўп қаватли уйлар сўнгги йилларда анча эскириб, аянчли ҳолатга келиб қолган. Бинолар деворларида ёриқлар пайдо бўлган, сувоқлари тўкилган, том ва поллари яроқсиз ҳолда. 16 оиланинг хавфсизлигини таъминлаш масаласи долзарб вазифага айланган эди. Аҳолининг ҳолатини ҳар томонлама ўрганган туман раҳбарияти ва туман маслаҳати депутатлари муаммони ҳал этиш йўлларини кўриб чиқди. Натижада, турғунларни янги бошпана билан таъминлаш борасида қарор қабул қилинди.

Ўтган йили янги уйлар қурилиши бошланди. Қурилиш ишлари олиб борилган даврда аҳоли вақтинча ижара уйларга жойлаштирилди. Уларнинг ижара ҳақи давлат ҳисобидан тўланди. Бугунги кунда қурилиш ишлари якунланиб, 16 оила учун янги ва қулай хонадонларнинг эшиги очилди.

Янги хонадонлар калитини топшириш маросимида туман маслаҳати раиси Медет Қасимов, туман оқсоқоллари ҳамда фаоллар иштирок этишди. Тантанали тадбирда туман ҳокими Серик Усенули аҳолини қувончли воқеа билан табриклаб, амалга оширилаётган ишларнинг асосий мақсади – фуқароларнинг хавфсиз ва қулай ҳаёт кечириши учун муносиб шароит яратишдан иборат эканлигини таъкидлади.