Вилоят ҳокими Нуралхан Кўшеров Сайрам туманига хизмат сафари чоғида Оқсувкент қишлоғида қурилиши бошланган Австралия технологияси асосида мол сотиш биржаси-бозор қурилишига тамал тошини қўйиш тадбирида иштирок этди. Вилоят раҳбари мазкур лойиҳанинг ҳудуд иқтисодиёти учун аҳамияти залворли эканини таъкидлади.

– Бугун биз кўҳна Сайрам заминида яна бир муҳим воқеанинг гувоҳи бўлмоқдамиз. Барчамиз “RED GOLD” масъулияти чекланган биродарлигининг мол биржаси лойиҳасига тамал тош қўйиш маросимига йиғилдик. Давлат раҳбари сармоя жалб этиш, қишлоқ хўжалигини тараққий эттириш ва янги иш ўринларини барпо этиш ҳудудларнинг иқтисодий салоҳиятини юксалтиришнинг муҳим йўналишлари эканлигини таъкидлаган эди. Ушбу лойиҳа мазкур топшириқларнинг амалдаги ёрқин ифодаси. Мол биржаси мамлакатимизда муқобили йўқ, йирик ва муҳим лойиҳалардан. Ушбу ташаббус вилоят сармоявий салоҳиятини ошириш, қишлоқ хўжалигини янги босқичга кўтариш ҳамда ҳудуд иқтисодиётини ранг-баранглаштиришга қаратилган. Биз ҳудуднинг иқтисодий салоҳиятини юксалтирувчи ташаббусларни қўллаб-қувватлаймиз. Ушбу эзгу лойиҳанинг амалга ошишига ҳисса қўшаётган сармоядорлар ва фаол иштирок этаётган барча ҳамюртларга миннатдорчилик билдираман. Иншоот қурилиши муваффақиятли якунланиб, эл манфаатига хизмат қилишига ишонаман, – деди вилоят раҳбари Нуралхан Ўралбайули.