25 сентябрь куни Давлат раҳбари Қасим-Жўмарт Тўқаев иштирокида ўтган Қозоғистон – Хитой форуми доирасида мамлакатимизда янги сармоявий лойиҳаларни амалга ошириш юзасидан шартнома имзоланди. 

Шундан сўнг вилоятимизда агрокимё соҳасини ривожлантиришга қаратилган йирик лойиҳани амалга ошириш ишлари бошланди. “Туран кимё компанияси” МЧБ синтетик аммиак ва карбамид ишлаб чиқарадиган завод қурилишига тамал тоши қўйиш тадбирини ўтказди.

Маросимда вилоят ҳокими Нуралхан Кўшеров, лойиҳа сармоядори Чжан Цихай, компания вакиллари ҳамда соҳа мутахассислари иштирок этишди.

– Асосий мақсадимиз ишлаб чиқариш ва қайта ишлаш тизимини тўлиқ шакллантиришдан иборат. Ўтрор тумани ва Туркистон шаҳрида пахта-тўқима кластери шаклланди. Энди – агрокимё соҳасини ривожлантиришга устувор аҳамият қаратамиз. Лойиҳани амалга ошираётган сармоядорларга миннатдорчилик билдираман. Янги завод минтақамиз тараққиётига, қишлоқ хўжалигини ривожлантиришга ва янги иш ўринлари яратилишига хизмат қилади, – деди Нуралхан Кўшеров.

Саврон туманидаги махсус иқтисодий минтақада амалга ошириладиган лойиҳанинг қиймати – 200 миллион АҚШ долларини ташкил этади. Корхона йилига 250 минг синтетик аммиак ва 300 минг тонна карбамид ишлаб чиқариш қувватига эга бўлиб, 300 киши иш билан таъминланади.