Вилоятимизда Қозоғистон ва Ўзбекистон Президентларининг келишуви асосида икки мамлакат чегарасида “Марказий Осиё” халқаро саноат кооперация маркази барпо этилган. Бугунги кунда иншоотга ташқи муҳандислик-коммуникация инфратузилмасини тортиш ишлари юритилмоқда. Мақтаарал туманида жойлашган марказнинг умумий майдони 100 гектарни ташкил қилади. У ерда қатор ишлаб чиқариш лойиҳаларини амалга ошириш режаланган.

Вилоят ҳокими ўринбосари Қанат Қайипбек Мақтаарал туманига хизмат сафари давомида мазкур марказни оралаб, олиб борилаётган тадбирлар билан яқиндан танишди. 

– Бу ерда сармоядор учун барча шароит яратилиши зарур. Айниқса, инфратузилмани тортиш, ер участкаларини ҳужжатлаштириш ва тегишли рухсатномалар олишда тадбиркорлар ҳар томонлама қўллаб-қувватланиши керак, – деди Қанат Қайипбек.

Туман ҳокими Бақит Асанов махсус иқтисодий ҳудудда олиб борилаётган ишлар ва режалар юзасидан маълумот берди.

Инфратузилма билан таъминлаш мақсадида ҳокимлик томонидан 8та бино барпо этилган. Ҳозир у ерда 47,5 миллиард тенгелик сармоявий лойиҳалар тўпланмасини шакллантириш тадбирлари юритилмоқда.

Халқаро саноат кооперация маркази икки мамлакат ўртасида савдо-иқтисодий алоқаларни кенгайтириш ва логистик имкониятлардан самарали фойдаланиш имконини беради.