Туркистон шаҳрида янги саноат корхоналарини ишга туширишга қаратилган сармоявий  лойиҳалар  амалга оширилмоқда. Айни пайтда «TURAN» махсус иқтисодий минтақаси ва Саноат парки ҳудудида қатор заводларнинг қурилиши жадал  давом этяпти.

Вилоят ҳокими ўринбосари Қанат Қайипбек «TURAN» махсус иқтисодий минтақасида бўлиб, барпо этилаётган  корхоналардаги ишлар билан танишди. У лойиҳа раҳбарлари билан учрашиб, қурилишни белгиланган муддатларда якунлаш ва ишларни жадаллаштириш юзасидан топшириқлар берди.

Шу ерда «Hygeia Textile Kazakhstan» МЧБнинг йигирув ва газлама  ишлаб чиқарадиган фабрикаси қад ростламоқда. 20 гектар майдонни эгаллаган мазкур лойиҳа доирасида ишлаб чиқариш бинолари билан бир қаторда икки қаватли ётоқхона ҳам барпо этилмоқда. Корхона тўлиқ қувватда ишга тушгач, қарийб 1000та янги иш ўрни яратилиши режалаштирилган.

«Eurasian Packing Materials» МЧБ эса скотч ишлаб чиқариш учун хомашё тайёрлайдиган завод барпо этмоқда. 1,97 гектар майдонда барпо этилаётган завод ишга тушгач, 50 нафар киши доимий иш билан таъминланади.

Шунингдек, махсус иқтисодий минтақа  ҳудудида сендвич-панеллар  ва полиэтилен плёнка, қишлоқ хўжалиги техникаси ва эҳтиёт қисмлари, биологик парчаланадиган  бир марталик  идишлар  ҳамда қадоқлар, дизель-генератор қурилмаларини ишлаб чиқарадиган корхоналар барпо этилмоқда.

Янги ишлаб чиқариш лойиҳалари Туркистон шаҳридаги Саноат паркида ҳам амалга оширилмоқда. Бу ерда ҳам  қатор сармоявий лойиҳалар доирасида  ишлаб чиқариш майдонлари тайёрланмоқда.

Вилоят раҳбарияти томонидан заводлар қурилишини сифатли ва белгиланган муддатда якунлаш, корхоналарни зарур инфратузилма билан таъминлаш ҳамда лойиҳаларни ўз вақтида ишга туширишга алоҳида эътибор қаратилмоқда.