Қозоғистон Президенти Қасим-Жўмарт Тўқаев Астанада ўтказилган халқаро “AI & Digital Bridge-2026” форумининг ялпи мажлисида нутқ сўзлади.

Давлат раҳбари анжуман сунъий идрок ва рақамли технологиялар соҳасида халқаро ҳамкорлик, янги ғоялар ва инновацион лойиҳаларни муҳокама қилиш учун нуфузли майдонга айланганини таъкидлади.

Президентнинг қайд этишича, сунъий идрок саноат, молия, таълим, илм-фан ва давлат бошқарувини жадал ўзгартирмоқда. Шу боис Қозоғистонда рақамли давлатни шакллантириш, инновацион стартапларни қўллаб-қувватлаш ва илғор технологияларни амалиётга жорий этишга алоҳида эътибор қаратилмоқда.

Қ. Тўқаев иқтисодиёт эҳтиёжларидан келиб чиқиб, саноат соҳасида сунъий идрокка оид вазифалар рўйхатини шакллантириш ва улар асосида “AI Challenge” танловини йўлга қўйишни таклиф қилди. Самарадорлиги исботланган энг яхши лойиҳалар ишлаб чиқаришга жорий этилади.

Давлат раҳбари сунъий идрок соҳасида хавфсизлик, шахсий маълумотларни ҳимоя қилиш ва масъулиятли ёндашув муҳимлигини қайд этди. Шунингдек, янги технологик иқтисодиёт учун кучли илмий-муҳандислик мактабини шакллантириш зарурлигини таъкидлади.

Президент Қозоғистон сунъий идрокдан тинч, хавфсиз ва масъулиятли фойдаланиш тарафдори эканлигини маълум қилиб, технологиялар инсон манфаатига хизмат қилиши кераклигини таъкидлади.

Қасим-Жўмарт Тўқаевнинг таъкидлашича, рақамлаштириш ва сунъий идрок йилининг асосий вазифаси эришилган натижаларни ҳар бир фуқаро ҳаётида сезиларли даражада амалий самарага айлантиришдан иборат.