Туркистон вилоятида қатор йирик лойиҳаларни амалга ошириш режалаштирилган. Жумладан, Туркистон шаҳридаги “Turan” махсус иқтисодий ҳудудда 2 гектар майдонда полимер дисперсияларини синтез қилишга мўлжалланган автоматлаштирилган завод қурилади. Шунингдек, 3,1 гектар майдонда пахта ва сомондан целлюлоза ишлаб чиқарадиган, 2 гектар майдонда кунгабоқар мойини қайта ишлаш заводи барпо этилади.

Бу ҳақда вилоят ҳокими Н. Кўшеров иштирок этган сармоявий штаб йиғилишида маълум қилинди. Мажлисда янги сармоявий лойиҳалар атрофлича кўриб чиқилди. 

Вилоят ҳокими мутасаддиларга мазкур лойиҳалар ижроси ва сармоядорлар учун қулай шарт-шароитлар яратиш ва лойиҳаларни ўз вақтида амалга ошириш юзасидан топшириқлар берди. 

“Махсус ҳудудлардан ер ажратилади. Агар қурилиш ишлари 6 ой ичида бошланмаса, ер давлатга қайтарилади”, деди ҳоким.

Йиғилишда маълум бўлишича, сентябрь ойида қатор корхоналар қурилиши бошланади. 

Саврон туманида ҳам сармоявий лойиҳалар амалга оширилади. Хусусан, “Turan” МИҲда карбамид ўғитлари ишлаб чиқарадиган завод қурилади. Шунингдек, 17 гектар майдонда юк машиналари ва автобуслар учун шиналар ишлаб чиқарадиган завод барпо этилади. Ушбу лойиҳа Қозоғистонда илк бор амалга оширилади. 

Мақтаарал туманида ҳам ишлаб чиқариш лойиҳалари амалга оширилмоқда. “Turan” МИҲда (“Орталық Азия” ХӨКО) 5 гектар майдонда ип йигирув фабрикаси барпо этилади. 

Сайрам туманида эса омбор мажмуасини қуриш лойиҳаси амалга оширилмоқда. 

Умуман, минтақага сармоя жалб этиш борасидаги саъй-ҳаракатлар яхши самара бермоқда. 8 йил давомида Туркистон вилояти иқтисодиётига 7 триллион 570,8 миллиард тенге сармоя жалб қилинди.