Вилоятимизда «Тоза Қозоғистон» дастури доирасида кўкаламзорлаштириш соҳасида илғор тажрибаларни татбиқ этиш, теракзор ва гулзорларни кўпайтириш  мақсадида “Дарахт ва гулли ўсимликларни етиштириш” мавзуида анжуман ўтди. Ўтрор тумани ва Арис шаҳри ҳудудидаги “Түркістан мақта” МЧБ базасида уюштирилган анжуманда вилоят ҳокими Нуралхан Кўшеров, шаҳар ва туман ҳокимлари иштирок этишди.

Вилоят ҳокимининг ўринбосари Нурбўл Турашбеков бошқарган анжуманда кўчат ўстиришнинг илғор тажрибалари мавзуида “Түркістан мақта” МЧБ вакили Ван Сипань, гул етиштириш бўйича “ChangAn Group” компанияси вакили Рэн Жиабога маъруза қилди. Кўкаламзорлаштириш соҳасига масъул раҳбарлар ва вакилларга шўр ерлар ва чўл минтақаларида кўчат ўстириш йўллари тушунтирилди.

Семинар якунида шаҳар ва туман ҳокимларига сифатли кўчат жамғармасини шакллантириш, ўсимлик турларини кўпайтириш ва кўчатларни маҳаллий тупроқда ўстириш ишларини кучайтириш юзасидан аниқ вазифалар берилди. Анжуман иштирокчилари “Түркістан мақта” МЧБ теракзорини кўздан кечириб, суғориш ва парваришлаш борасида мутахассислардан маслаҳатлар олишди.

Аҳоли манзилларини ободонлаштириш ва кўкаламзорлаштириш мақсадида гул етиштирадиган иссиқхоналар барпо этиш режаланган. Уларда 1 миллиондан зиёд гул кўчати етиштирилади.