Туркистон вилояти ҳокими Нуралхан Кўшеров Ўрдабоши туманидаги «Huating Biotechnology Co., LTD» компаниясининг ёғ ва желатин компонентларини ишлаб чиқарадиган заводи қурилиши билан танишди.

Темирлан аҳоли пунктида жойлашган корхона чорвачилик чиқиндиларини самарали қайта ишлаш ва суякни чуқур қайта ишлашга ихтисослашган. Заводда мол суякларидан ёғ ва желатин ишлаб чиқарилади. Шунингдек, суякни майдалаш орқали ундан турли идишлар ва бошқа маҳсулотлар, шунингдек, озуқа ишлаб чиқариш имкониятлари ҳам ўрганилмоқда.

Лойиҳанинг умумий инвестиция қиймати 9 миллиард тенгени ташкил этади. Унинг дастлабки босқичига 2,5 миллиард тенге сармоя киритилган. Биринчи босқични жорий йилнинг сентябрь ойида ишга тушириш режалаштирилган. Ушбу босқичда 30 киши иш билан таъминланади.

Корхонада йилига 5 минг тонна ёғ ва желатин компоненти ишлаб чиқарилиши режалаштирилган. Лойиҳа тўлиқ амалга оширилгач, 100 та янги иш ўрни яратилади.

Ҳозирги кунда заводда қурилиш-монтаж ишлари якунланган, асосий технологик ускуналар ўрнатилган. Айни пайтда ишга тушириш-созлаш ишлари олиб борилмоқда. Сармоядор келгусида ишлаб чиқариш ҳажмини кенгайтиришни режалаштирмоқда. Хусусан, мол қонини қайта ишлаб, ундан қўшимча маҳсулотлар ишлаб чиқариш имконияти ҳам кўриб чиқилмоқда.

Учрашув давомида вилоят ҳокими вилоятдаги бўрдоқичилик майдонларида тўпланадиган мол суякларини ушбу корхонага етказиб бериш имкониятини кўриб чиқишни таклиф қилди. Бу маҳаллий хом ашёдан самарали фойдаланиш ва қишлоқ хўжалиги маҳсулотларини қайта ишлаш занжирини кенгайтириш имконини беради.

Нуралхан Кўшеров заводни белгиланган муддатда ишга тушириш муҳимлигини таъкидлаб, масъул бошқарма раҳбарлари ва туман ҳокимига корхонани зарур муҳандислик инфратузилмаси билан тўлиқ таъминлаш масаласини зудлик билан ҳал этишни топширди.

Лойиҳанинг ишга туширилиши туманда чуқур қайта ишлаш ишлаб чиқаришини ривожлантириш, чорвачилик чиқиндиларини қайта ишлаш ва янги ишлаб чиқариш занжирини шакллантиришга хизмат қилади.