Туркистон вилояти ҳокими Нуралхан Кўшеров «ORANO» компаниялар гуруҳи Директорлар кенгашининг раиси Клод Имовен билан учрашди. Учрашувда Туркистон вилояти ва «ORANO» гуруҳи ўртасидаги ҳамкорликни янада мустаҳкамлаш ҳамда янги қўшма лойиҳаларни амалга ошириш масалалари муҳокама қилинди.

Ҳоким минтақанинг сармоявий салоҳиятига тўхталиб, ишлаб чиқариш корхоналари учун малакали мутахассислар тайёрлаш борасидаги ҳамкорликнинг муҳимлигини таъкидлади. 

– Биз учун сармоя жалб қилиш билан бирга, маҳаллий кадрларни тайёрлаш масаласи ҳам жуда долзарб. Бу йўналишда вилоятдаги коллежларни корхона ғамхўрлигига олиб, дуаль таълим тизими орқали ишлаб чиқариш корхоналари учун зарур мутахассисларни биргаликда тайёрлашни таклиф қиламиз. Бу ёшларга назарий билимлар билан бир қаторда, ҳақиқий ишлаб чиқариш тажрибасига эга бўлиш ва ўқишни тамомлагач, доимий ишга жойлашиш имконини беради, – деди вилоят ҳокими.

Клод Имовен Туркистон вилояти билан ҳамкорликни ривожлантиришга қизиқиш билдириб, ўзаро ҳамкорликни янада мустаҳкамлашга тайёр эканлигини маълум қилди.

Учрашувда томонлар сармоя ва кадрлар тайёрлаш йўналишларидаги қўшма ишларни ўрганиш, ишбилармонлик алоқаларини янада чуқурлаштириш борасида келишиб олдилар.