Минтақамизнинг Сариоғоч шаҳрида қайта таъмирланган темирйўл вокзали халққа хизматини бошлади. Иншоотнинг очилиш маросимида минтақа раҳбари Нуралхан Кўшеров, «Қозоғистон Темир Йўли» МК» ҲЖ Бошқаруви раиси Елжас Ўтиншиев, вилоят маслаҳати раиси Нурали Абишов, темирйўл соҳаси фахрийлари ва ходимлари иштирок этди. Вилоят ҳокими «Сариағаш» темирйўл вокзалининг минтақа учун аҳамиятига тўхталди.

– Барчангизни замон талабларига мос қайта таъмирланган вокзалнинг очилиши билан чин дилдан табриклайман! Ушбу муҳим лойиҳа Давлат раҳбари Қасим-Жўмарт Кемелулининг транспорт инфратузилмасини такомиллаштириш ва аҳолига қулай шароитлар яратиш юзасидан топшириқларига мувофиқ амалга оширилди. Жорий йил вилоятимизда жами 5та темирйўл вокзалининг инфратузилмаси янгиланди. Бугун мана шу янгиланган иншоотлардан бири – «Сариағаш» темирйўл вокзалининг очилишига гувоҳ бўлмоқдамиз. Замонавий вокзал туманнинг транспорт алоқасини яхшилашга, аҳолига кўрсатиладиган хизмат сифатини оширишга ижобий таъсир кўрсатишига ишонаман!, – деди Нуралхан Кўшеров.

Янгиланган вокзалда йўловчилар учун 30 ўринли кутиш зали, билет кассаси, маълумот бюроси ва ошхона назарда тутилган. Шунингдек, она ва бола учун хона, имконияти чекланган фуқаролар учун қулай муҳит, тиббий пункт ва транспорт полицияси бўлимининг хизмат кабинети жойлашган. Йўловчиларнинг хавфсиз ва қулай ҳаракатланишини таъминлаш мақсадида перрон янгиланди, вокзал ҳудудида ободонлаштириш ва кўкаламзорлаштириш ишлари олиб борилди. Вокзал 5 жуфт поездни қабул қилади ва бир кеча-кундузда 500га яқин йўловчига хизмат кўрсатиш қувватига эга.

Тадбир сўнггида меҳмонлар янгиланган вокзал биносини айланиб, иншоотнинг инфратузилмаси ва моддий-техник жиҳозланиши билан танишди.

Туркистон вилоятида темирйўл вокзалларини янгилаш ишлари босқичма-босқич олиб борилмоқда...