Рўйхат билан танишар эканман, янги конституциявий орган таркибини шакллантиришда жамоатчилик вакиллиги билан бир қаторда касбий салоҳият, тажриба ва ҳудудий мутаносибликка ҳам алоҳида эътибор қаратилгани кўзга ташланади.

Аввало, 42+42+42 формуласи тўлиқ сақланган. Яъни этномаданий бирлашмалардан – 42 нафар, жамоат бирлашмалари ва бошқа нодавлат нотижорат ташкилотларидан – 42 нафар, маслаҳатлар ҳамда жамоат кенгашларидан эса 42 нафар вакил жалб этилган. Бундай ёндашув муайян бир жамоат гуруҳининг устунлик қилишига йўл қўймай, турли қарашларни бир майдонда жамлаш имконини беради.

Яна бир эътиборли жиҳат – тажрибали мутахассислар ва янги номларнинг уйғунлиги. Кенгаш таркибидан аввал Миллий Қурултойда, Конституциявий ислоҳот бўйича комиссияда фаолият юритган фуқаролар, турли йилларда Парламент депутати бўлган тажрибали сиёсатчилар ҳам ўрин олган. Айни пайтда республика миқёсидаги бундай йирик жамоатчилик майдонида илк бор фаолият бошлаётган янги вакиллар ҳам кўп.

Учинчи жиҳат – ҳудудлар овозига кенг ўрин берилгани. Таркибнинг учдан биридан зиёдини мамлакатнинг барча ҳудудларидан вакиллар ташкил этади. Бу Халқ Кенгашига нафақат пойтахт даражасидаги, балки ҳудудлардаги долзарб масалаларни ҳам мунтазам кўтариб чиқиш имконини беради.

Касбий таркиб ҳам ранг-баранг. Кенгашда олимлар, ўқитувчилар, шифокорлар, ҳуқуқшунослар, тадбиркорлар, ишлаб чиқариш соҳаси вакиллари, журналистлар, маданият ва спорт намояндалари, IT ва ижодий индустрия мутахассислари, экологлар, кўнгиллилар, касаба уюшмалари ҳамда фуқаролик сектори вакиллари бор. Шунингдек, 20дан ортиқ этнос вакиллари қамраб олинган. Хотин-қизларнинг улуши 32 фоизни ташкил этади, ёшлар ҳам ўз вакилларига эга.

Буларнинг барчаси бир муҳим тамойилни намоён этади: Халқ Кенгаши фақат таниқли шахслар жамланган нуфузли майдон эмас, балки жамиятнинг турли қатламлари фикрини давлат қарорлари даражасига етказадиган амалий иш органи бўлиши керак.

Албатта, ҳар қандай институтнинг самарадорлигини унинг таркибигина эмас, амалий фаолияти белгилайди. Энди асосий вазифа – мавжуд салоҳиятдан самарали фойдаланиш, очиқ муҳокамалар учун шароит яратиш, ҳудудлар ва жамоатчиликдан кўтарилаётган масалаларни аниқ таклиф ва қарорларга айлантиришдан иборат.

Қозоғистон Халқ Кенгашининг барча аъзоларини масъулиятли вазифага сайлангани билан табриклайман!

Эл ишончини оқлаб, жамоатчилик тотувлиги ва мамлакат тараққиётига хизмат қиладиган самарали ташаббусларингиз кўп бўлсин. Фаолиятингизга муваффақият тилайман!