Саврон тумани ташкил топганига 3 йил ҳамда вилоят “Оңтүстік Қазақстан” ижтимоий-сиёсий газетасининг 100 йиллиги муносабати билан “Бақытым сенсің, Түркістан!” мавзуида оқинлар мушоираси ўтди. Унда 50дан зиёд оқин иштирок этди.

“Шеъриятга ошуфта ҳар кўнгил” деганларидек, мушоирада мактаб ўқувчилари ҳам иштирок этиб, янги шеърларини ўқиб беришди. Асосий босқичда 50 нафар шоир иштирок этиб, улардан 9 нафари якуний босқичга ўтди. Ҳакамлар ҳайъатининг қарорига кўра, савронлик шоир Ердаулет Бухарбай бош совринни қўлга киритиб, 500 минг тенгелик пул мукофоти билан тақдирланди. Биринчи ўрин туркистонлик Даурен Тилеуханга насиб қилса, иккинчи ўрин Нурғиса Тўремуратқа буюрди. Иккита учинчи ўринга Рўза Султаналиева ва Арқалиқ Амалият эга бўлишди.

Шунингдек, бошқа иштирокчилар ҳам махсус номинациялар бўйича тақдирланди. Саврон тумани ҳокимининг махсус соврини – Жанадил Сейдановга, ёзувчи, журналист Нурмахан Ўразбеков номидаги номинация – Азамат Алибекка насиб қилди. Шоир Ўмирбай Саурбаев номидаги номинация – Лаура Тастанбекка насиб этса, Қанибек Сарибаев номидаги номинацияга – Даурен Айманбет лойиқ деб топилди. Барча иштирокчиларга пул мукофотлари топширилди.