Шимкент шаҳридаги Ж. Ташенов номидаги университетда маҳаллий шоир ва ёзувчилар билан учрашув ўтди.

Унда Қозоғистон Ёзувчилар уюшмаси аъзолари – Соатой Камолова ва Зокиржон Мўминжонов, шунингдек, таниқли ижодкорлар Абдурауф Абдуғаффоров, Барно Исоқова ҳамда Эркиной Султоновалар иштирок этдилар. Улар ўз ижодий тажрибаси, адабиётга бўлган муносабати, ёзувчилик сир-асрорлари ҳақида талабалар билан самимий суҳбатлашишди.

Университетнинг Халқаро ҳамкорлик департаменти директори Шаҳло Норалиеванинг таъкидлашича, бугунги кунда дорилфунунда 9 мингдан зиёд талаба таҳсил олмоқда. Улар орасида 120 нафар талаба “Ўзбек тили ва адабиёти ўқитувчиси” ихтисослиги бўйича тақсил олмоқда. Бу ўқув даргоҳида ўзбек тили ва адабиётига эътиборнинг юксаклигини намоён этади.

Тадбир ижодкорлар ҳақидаги видеотасвирлар намойиши билан бошланди. Унда шоир ва ёзувчиларнинг ҳаёт йўли, ютуқлари ва адабиётдаги ўрни ҳақида қизиқарли маълумотлар берилди. С. Камолова аёл қалбининг нозик туйғулари, она юртга муҳаббат, инсонийлик фазилатларини улуғласа, З. Мўминжонов инсон қалбидаги тозалик, маънавий баркамоллик мавзуларини ёритади. А. Абдуғаффоров ва Э. Султоновалар ижодлари орқали ёшлар онгига яхшилик, меҳр-шафқат ва ватанпарварлик ғояларини сингдиришга ҳаракат қилишади. Барно Исоқова шеърларида замонавий инсон кечинмалари, ҳаётнинг ранг-баранг жиҳатларини юксак бадиий савияда тасвирлайди. Учрашув давомида меҳмонлар ўз ижод намуналаридан, қозоқ тилидан ўгирилган таржималаридан ўқишди, талабаларнинг саволларига жавоблар беришди.

Тадбир якунида университетнинг катта ўқитувчиси Озода Мусаева ижодкорларга самимий миннатдорчилик билдириб, мазкур учрашув талабаларнинг дунёқараши ва маънавий салоҳиятини оширишда, улар қалбида Ватан, халқ ва инсонга бўлган муҳаббатни мустаҳкамлашда муҳим аҳамият касб этишини қайд этди.