Қозоғистон халқи Ассамблеясининг 30 йиллиги доирасида Келес туманидаги А. Кенжеев номидаги Маданият уйида ҳокимлик ва марказий кутубхонанинг ташаббуси билан таниқли муаллима, бир қанча китоблар муаллифи Робия Дўстонованинг ижодий фаолияти ҳамда “Олтин бешик” ва “Ҳамроз” китобларининг тақдимотига бағишланган “Икки элга ярашган қўшиқ” мавзуида маданий-маърифий тадбир ўтди.

Дарҳақиқат, Р. Дўстонова қизғин ижодий фаолияти билан элга танилган ижодкор. Қисқа вақтда унинг “Ўлан – сўзнинг подшоси”, “Дўстлик боғи”, “Қучоғимга сиғдираман оламни” каби муаллифлик ва таржима китоблари нашр қилиниб, жамоатчилик томонидан эътироф этилди. Жумладан, яқинда нашрдан чиққан “Олтин бешик” тўплами Қозоғистон Ёзувчилар ва бахши-жировлар уюшмалари аъзоси, Қозоғистонда хизмат кўрсатган маданият ходими Тўлеужан Ғумаровнинг таржима қилинган асарлари, Ўзбекистон  Республикасининг “Ватандошлар” жамоат жамғармаси ҳомийлигида чоп этилган “Ҳамроз” китобида эса муаллифнинг шеърлари, долзарб мавзудаги публицистик мақолалари ва бадиалари жамланган. 

Тадбир аввалида “АМАNАТ” партиясининг Келес тумани филиали ижроия котиби Ерлан Ахметов таниқли устоз ва таржимон Р. Дўстонованинг ижодий фаолиятига юксак баҳо бериб, унга туман ҳокими Жанибек Ағибаевнинг ташаккурномасини тақдим этди. “Ижодкор” бирлашмаси раиси Зокиржон Мўминжонов, Шимкент шаҳар ЎЭМБ раиси ўринбосари Аббос Шомирзаевлар устозни табриклаб, эсдалик совғаларини топширдилар. 

Шундан сўнг сўз олган Ўзбекистон Ёзувчилар уюшмасининг ёшлар билан ишлаш бўлими мудираси Маъмура Зоҳидова мазкур уюшма раиси Сирожиддин Саидовнинг Р. Дўстоновага  йўллаган табригини ўқиб эшиттирди ва Алишер Навоийнинг беш жилдли  “Хамса” китобини совға қилди. 

Қозоқ ва ўзбек адабий алоқаларини мустаҳкамлашдаги самарали хизматлари учун Ўзбекистон Ёзувчилар уюшмаси етакчи мутахассиси Наргиза Асадова ҚХАнинг “Дўстлик” медали билан тақдирланди, уюшманинг қозоқ адабиёти бўлими раҳбари Турсунали Аҳмедовнинг кифтига  зарбоф тўн ёпилди. Ўзбекистонлик меҳмонлар М. Зоҳидова, Т. Аҳмедов, Н. Асадова ва журналист Сабоҳат Саид Ризо “Дўстлик” ҳамжамиятининг ташаккурномалари билан тақдирландилар.

Ушбу ҳамжамият раисининг ўринбосари Нурхон Дўсматова, Келес туман ЎЭМБ раиси 

С. Тожиаҳмедов, таниқли ижодкорлар Абдурауф Абдуғаффоров, Баҳодир Оташ, Комилжон Солибеков, Победа Абдазимова, Тошбуви Йўлдошева, Нурхон Аюб қизи, Гулиосиё Ҳасанова, Шарофат Тожиева, “Чимкент” адабий уюшмасининг раҳбари Эркиной Султонова, Ж. Ташенов  номидаги университетнинг катта ўқитувчиси Озодахон Мусаева, Қозоғистон Ёзувчилари уюшмаси аъзоси, Тўқаш Бердияров номидаги адабиёт ва санъат бирлашмасининг раиси Бердали Рисбек, Т. Бегманова номли мактаб директорининг ўринбосари Муҳаммадқали Абдиевлар ҳам шоира-таржимон Робия Қамчибек қизига самимий тилакларини изҳор қилишди. 

Тадбирда иштирок этган Т. Бегманова номли мактаб ўқувчилари Р. Дўстонованинг шеърларидан ўқиб беришди. Туман Маданият уйи хонандалари ижросидаги қўшиқ ва рақслар даврага файз киритди.

Бахтли оила бекаси Робия Қамчибек қизи турмуш ўртоғи Бахтиёр билан икки ўғил ва бир қиз – Жонибек, Ёрқинбек ва Комилахонларни тарбиялаб, вояга етказишган. Бугунги кунда улар 12та набиранинг суюкли буви ва буваларидир.

Келес туманида уюштирилган адабий шодиёна “Қимизхана” тамаддихонасида ёзилган тўкин дастурхон атрофида поёнига етди.