Вилоятда яна бир йирик ишлаб чиқариш мажмуаси барпо этилади. Вилоят ҳокими Дархан Сатибалдининг сармоядорлар билан навбатдаги учрашувида янги лойиҳа атрофлича муҳокама қилинди. Натижада, вилоят ҳокимлиги ҳамда Qingdao Wanlin Food Со озиқ-овқат компанияси раҳбарияти ўртасида ҳамкорлик меморандуми имзоланди.

Шартнома доирасида вилоятнинг индустриявий минтақасида мева-сабзавот базаси барпо этилади. Унда мева-сабзавот қуритадиган, яъни пиёз, саримсоқ билан бирга биологик фаол қўшимчалар ҳамда ем-хашак ишлаб чиқарадиган корхона мажмуасининг қурилиши режаланган. Лойиҳа қиймати 30 млн. АҚШ долларини ташкил этади. Замонавий мажмуа қурилишининг биринчи босқичида 50 минг тонна тайёр маҳсулот ишлаб чиқарилади.

Янги корхонанинг ишга туширилиши янги иш ўринлари очилиши орқали минтақа аҳолисининг фаровонлигини оширишга хизмат қилади. Вилоят ҳокими Дархан Сатибалди янги лойиҳанинг муваффақиятли амалга оширилишига ишонч билдириб, сармоядорларга давлат томонидан ҳар томонлама ёрдам кўрсатилишини таъкидлади.

 Wanlin Group 1991 йили ташкил топган, компания кексаларни парваришлаш ҳамда озиқ-овқат ишлаб чиқариш каби икки асосий йўналишда фаолият юритади.