Вилоятимизда узумчилик соҳасини ривожлантиришда янги технологиялар қўлланилади. Ушбу масала Сайрам туманида ўтган дала семинарида атрофлича муҳокама қилинди. Унда махсус иштирок этган вилоят ҳокими Дархан Сатибалди олимлар ва деҳқонлар билан фикр алмашди. 

«Қишлоқ хўжалигини ривожлантириш: «ЭКО-боғ» узумзорларида экспортга мўлжалланган, бозорда юқори талабга эга узум навлари ўстиришда илғор инновацион технологиялар ва замонавий машиналардан самарали фойдаланиш» мавзуида ўтган дала семинарида малакали олимлар, деҳқон хўжаликлари, тадбиркорлар иштирок этди. Ўзбекистондан келган «Eco Fruit Conseil» компанияси раҳбари Шуҳрат Аброров қўшни мамлакатдаги узумчилик тажрибаси билан таништирди. 

Вилоят ҳокими Дархан Сатибалди узумчилик соҳасининг аҳамиятига тўхталди.

– Эски усуллардан воз кечиб, янги технологиялардан фойдаланиш лозим. Илм-фан, қишлоқ хўжалиги равнақ топмоқда. Жорий йил Хитойга борганимизда, узумзорларни кўздан кечирдик. Уларда ҳосилдорлик юқори ва меваларнинг мазаси ўзгача. Улар боғбонларимизга иш тажрибаларини ўргатишга тайёр. Ҳамкорлик қилиш, янги технологияларни татбиқ этиш ўта муҳим. Бу борада олимларимиз ноқулай об-ҳавога чидамли, мўл ҳосил берадиган узум навларини яратишларига ишонамиз, – деди Дархан Сатибалди.

Семинарда “ДАНА” моделли хўжалиги муассиси, ҚР Миллий аграр фанлар академияси академиги Бердияр Қалимбетов Сайрам туманида таҳлилдан ўтган узум навлари экилгани, улар яхши ўсаётганини айтди. У махсус технология ва машиналар мажмуаси билан таништирди. Бу ерда 3 гектарда узумзор ташкил қилинган. Унда етиштирилган маҳсулот экспорт қилинмоқда. Илғор технологиялардан фойдаланиш натижасида гектаридан 15 тонна ҳосил олиш кўзланган. 

Вилоят ҳокими Сайрам туманига хизмат сафарида “Манкент” оромгоҳида бўлиб, сув тежовчи ускуналардан фойдаланиш натижаси билан танишди. Оромгоҳ ўз маблағига ёмғирлатиб суғориш технологиясини харид қилиб, бедазорни суғормоқда. 

Натижада сув 50 фоизгача тежалмоқда, унумдорлик эса 200 центнерга етказилади.