Сайрам тумани спортчилари Венгриянинг Будапешт шаҳрида спортнинг кикбоксинг туридан ўтган жаҳон чемпионатида 2та олтин, 2та бронза медалларини олиб келишди. Улар сафида қишлоғимиз фахри бўлган спортчилар Музаффарбек Каримов ҳамда Олимжон Мадикаримовлар ҳам бор.

Ватанимиз байроғини юксак кўтариб, мағрур ҳилпиратиб, дунёга танитаётган чемпионларимиз билан ҳар қанча фахрлансак арзийди. 

Туман шарафини ҳимоя қилган чемпионларни қишлоқ ҳокими М. Нажиев раҳбарлигида қишлоқ аҳолиси, оқсоқоллар, мактаб директорлари, илмий мудирлар ҳамда ҳомийлар – Сардор Жалолов, Сардор Лалиев ва энг юксак масъулиятни зиммасига олган Ифтихор Жалоловлар зўр тантана билан кутиб олишди.

Спортчиларимиз қатор чўққиларни забт этиб улгуришган. Музаффарбек Каримов – кикбоксинг бўйича ҚР чемпиони, жаҳон чемпионатида иккинчи ўринни эгаллаган Осиё чемпиони. Эндиликда жаҳон чемпиони. Олимжон Мадикаримов ҳам кикбоксинг бўйича ҚР чемпиони, Осиё чемпиони бўлди. Бугунги кунда жаҳон чемпионатида учинчи ўринни эгаллади.

Тадбирда сўзга чиққанлар чемпионларнинг ота-оналарига, устоз-мураббийларига чексиз олқишлар айтишди. 

Тадбир давомида спортчиларимизга туман ҳокимининг эсдалик совғалари топширилди ҳамда ёшларга спорт билан шуғулланиб, қишлоғимиз фахри бўлишларини тилаб қолди.