Мақтаарал тумани далаларида Хитой технологияси асосида томчилатиб суғориш тизими жорий этилди. Бу усул сувни тежаб, мўл ҳосил олиш учун замин яратади. Туман ҳудудида Ўзбекистоннинг “Global textile” тўқимачилик компанияси пахта толасини чуқур қайта ишлайдиган завод барпо этишни режалаштирмоқда. Ушбу лойиҳа минтақада пахта кластерини жадал ривожлантириш имконини беради.

 “Хамро-Ата” деҳқон хўжалиги жорий йилда пахтани анча кеч, яъни, апрель ойининг сўнггида экди. Аммо, томчилатиб суғориш усулининг самараси ўлароқ шу кунларда баракали ҳосил олинмоқда. Умуман, янги технология туман бўйича 312 гектар ерда қўлланилмоқда. Чигит ерга қадалган кундан бошлаб, далага бирорта техника кирмади. Харажати оз, қўл кучига эҳтиёж бўлмади.

Хўжалик раҳбари Абдужалил Боевнинг айтишича, минерал ўғитлар жадвал асосида бериб борилди.

– Теримни бошладик, режа – гектаридан 60 центнердан “оқ олтин” териб олиш. Уни техника ёрдамида йиғиштириб оламиз, – дейди тажрибали пахтакор. 

Ушбу деҳқон хўжалигига 500 миллион тенге сармоя жалб қилинди. Лойиҳанинг ўзгачалиги, анъанавий усулга нисбатан оқар сув сарфи 50 фоизгача тежалиб, ҳосилдорлик гектарига 60-70 центнерга ортади.

Туман деҳқонлари бир асрга яқин даврдан буён пахтачилик билан шуғулланиб келади. Бироқ, бугунги кунгача етиштирилган ҳосил хомашё сифатида сотилмоқда. Келгусида бунга барҳам берилади. Ўзбекистоннинг “Global textile” компанияси билан тузилган шартнома асосида қиймати 45 миллион долларни ташкил этувчи лойиҳа амалга оширилади, натижада пахтани қайта ишлаш заводи, пахта-газлама фабрикаси, газламани бўяш фабрикаси ҳамда тикувчилик фабрикалари ишга туширилади.