KAZINFORM. ҚР Президенти Қасим-Жўмарт Тўқаев Самарқанд шаҳридаги саммит доирасида Ўзбекистон Президенти Шавкат Мирзиёев билан учрашди, дея хабар беради Ақўрданинг матбуот хизмати.

Учрашувда ҚР Президенти Самарқандда ўтаётган “Марказий Осиё – Европа Иттифоқи” саммитига алоҳида аҳамият қаратишини таъкидлади. Қасим-Жўмарт Тўқаев мазкур тадбир минтақа ва Европа Иттифоқи ўртасидаги мулоқотни ривожлантиришга хизмат қилишига ишонч билдирди.

Мулоқот чоғида Қозоғистон – Ўзбекистон стратегик шериклик ва иттифоқчилик муносабатларини икки давлат раҳбарларининг яқинда Алмати шаҳрида ўтган норасмий учрашувида эришилган келишувларни инобатга олган ҳолда янада ривожлантириш ҳамда мустаҳкамлашнинг долзарб масалалари муҳокама қилинди.

Икки мамлакат ҳукуматлари товар айирбошлашни кўпайтириш, иқтисодий лойиҳалар ва гуманитар дастурларни, шу жумладан, ҳудудлар даражасида илгари суриш бўйича мувофиқлаштирилган чора-тадбирлар кўриш муҳимлиги таъкидланди.

Халқаро саноат кооперацияси марказини ишга тушириш жараёнини тезлаштириш тўғрисида келишиб олинди.

Шунингдек, минтақавий кун тартиби юзасидан фикр алмашилди, олий даражадаги тадбирлар жадвали кўриб чиқилди.

Давлат раҳбарлари Қозоғистон ва Ўзбекистон ўртасидаги ҳамкорлик юқори суръатда ривожланаётганини қайд этиб, икки томонлама муносабатларнинг барча йўналишлари бўйича ўзаро манфаатли шерикликни кенгайтиришга тайёр эканликларини тасдиқладилар.