Kazinform. Алмати шаҳрида Қозоғистон Республикаси Президенти номидан ёшлар фаоллари, ижодий индустрия ва этномаданият бирлашмалари вакилларига мамлакатнинг янги таҳрирдаги Конституциясининг махсус нашрини тантанали равишда топшириш тадбири ўтди.

Унда Қозоғистон Республикаси Бош вазири ўринбосари – Маданият ва ахборот вазири Аида Балаева иштирок этиб, Давлат раҳбарининг шахсий мурожаати ўрин олган Конституция нусхаларини иштирокчиларга топширди.

Президент мурожаатида мамлакат тараққиётига муносиб ҳисса қўшаётган фуқароларга самимий миннатдорчилик билдирилган.

“Конституцияда мустаҳкамланган эзгу қадриятлар ва тамойиллар халқ фаровонлигини янада ошириш, мамлакатнинг ҳар томонлама юксалишига хизмат қилишига ишончим комил. Давлатимиз қудрати янада мустаҳкамлансин, Ватанимиз равнақ топсин”, дейилади мурожаатда.

Маросимда сўзга чиққан Аида Балаева янги таҳрирдаги Конституция Қозоғистон жамиятининг асосий қадриятларини ўзида мужассам этган муҳим сиёсий-ҳуқуқий ҳужжат эканлигини таъкидлади.

Унинг сўзларига кўра, Конституция муқаддимасида Адолатпарвар Қозоғистон ғояси, “Қонун ва интизом” тамойили, фуқароларнинг ҳуқуқ ҳамда эркинликларини сўзсиз таъминлаш, миллатлараро ва конфессиялараро тотувлик, бирдамлик ва ҳамжиҳатлик каби устувор қадриятлар мустаҳкамланган.

– Мазкур тамойиллар тинчлик, ўзаро ҳурмат ва ишонч барқарор тараққиётнинг мустаҳкам пойдевори бўлган мамлакатимиз учун ғоят муҳим аҳамият касб этади. Конституция фақат давлат институтлари фаолияти учунгина эмас, балки ҳар бир фуқаро ва ҳар бир жамоат бирлашмаси учун ҳам дастуриламал вазифасини ўтайди. Зеро, мамлакатимиздаги барча эзгу саъй-ҳаракатлар Қозоғистон халқи бирлиги ва жамият ҳамжиҳатлигини янада мустаҳкамлашга хизмат қилиши лозим, – деди Аида Балаева.

Шунингдек, Бош вазир ўринбосари янги маслаҳат-кенгаш тизими – “Қозоғистон Халқ Кенгаши” ташкил этилишига ҳам тўхталди. Қайд этилганидек, ушбу кенгаш таркибининг учдан бир қисмини мамлакатдаги этномаданият бирлашмалари вакиллари ташкил этади. Қолган ўринлар нодавлат-нотижорат ташкилотлари ҳамда маҳаллий вакиллик тизимлари ўртасида мутаносиб тақсимланади.

Таъкидланишича, мазкур тузилма “Тингловчи давлат” ва “Адолатпарвар давлат” тамойиллари асосида давлат ҳамда жамият ўртасида очиқ ва самарали мулоқотни йўлга қўйишга хизмат қилади.

Эслатиб ўтамиз, жорий йил 15 март куни ўтказилган республика референдумида Қозоғистон Республикасининг янги таҳрирдаги Конституцияси қабул қилинган эди. Янги таҳрирда Адолатпарвар Қозоғистон ғояси ва “Қонун ва интизом” тамойили конституциявий даражада мустаҳкамланиб, инсон ҳуқуқ ва эркинликларининг кафолатлари янада кучайтирилди. Шунингдек, ҳужжатнинг муҳим янгиликлари сифатида бир палатали парламент – Қурултой ҳамда “Қозоғистон Халқ Кенгаши” институти ташкил этилди.