Сариоғоч туманида аҳоли саломатлигини муҳофаза қилиш, тиббий хизмат сифати ва ҳаммабоплигини оширишга қаратилган тадбирлар изчил амалга оширилмоқда. Шу мақсадда туман ҳудудида қатор соғликни сақлаш муассасалари барпо этилмоқда.

Сариоғоч тумани ҳокими Арман Абдуллаев Жартитўбе ва Кўктерек қишлоқларида барпо этилаётган тиббиёт муассасалари қурилиши билан танишиб, ишлар сифати ҳамда уларнинг белгиланган муддатларда амалга оширилишини назорат қилди.

Қурилиш майдонларини кўздан кечираркан туман ҳокими иншоотларни сифатли тарзда ва белгиланган муддатда фойдаланишга топшириш муҳимлигига урғу берди. Шунингдек, у мазкур иншоотлар қишлоқ аҳолиси учун муҳим ижтимоий аҳамиятга молик эканлигини қайд этди.

Ташриф пировардида туман ҳокими Жартитўбе қишлоғи ҳокимига қурилиш ишларини ташкил этишга оид танқидий фикрлар билдириб, аниқланган камчиликларни қисқа муддатда бартараф этиш вазифасини топширди.

Айни пайтда шу қишлоқнинг Бўстонлиқ аҳоли манзилида қад ростлаётган тиббиёт муассасасининг ички пардозлаш ишлари олиб борилмоқда. Навбатдаги босқичда бинога ташқи қоплама билан безаш ва ҳудудни ободонлаштириш ишлари амалга оширилади.

Кўктерек қишлоғининг Дархан аҳоли манзилида барпо этилаётган фельдшерлик-акушерлик нуқтасида ғишт териш ишлари тўлиқ якунланган. 

Мазкур лойиҳалар тўлиқ амалга оширилгач, аҳоли дастлабки тиббий-санитария ёрдамини олиш ва замонавий талабларга жавоб берадиган сифатли тиббий хизматдан фойдаланиш имкониятига эга бўлади.