2026 йил 23 август куни Қозоғистон Республикаси фуқаролари мамлакатимизнинг ижтимоий-сиёсий ҳаётидаги жуда муҳим тарихий жараёнга – янги бир палатали Парламент – Қурултой депутатлари сайловида иштирок этади. Ушбу жараён – мамлакатимизнинг сиёсий тизимини янгилаш йўлидаги шахдам қадам, шунингдек, фикрлар эркин билдириладиган, қонун чиқарувчи ваколатли ташкилотни шакллантиришнинг ўзгача босқичи.

Зиммамизга юкланган масъулиятни чуқур ҳис қилган ҳолда Туркистон вилоят ҳудудий сайлов комиссияси барча даражадаги сайлов комиссиялари билан ҳамкорликда ушбу сиёсий жараённи юксак савияда уюштириш учун тизимли тадбирларни амалга оширмоқда. Бизнинг асосий йўналишимиз билан ўзгармас шиоримиз – қонунийлик, ошкоралик ва адолатпарварлик. Бугунги кунда вилоят ҳудудида 952та сайлов участкаси тўлақонли фаолият юритмоқда. Уларда 6290 нафар сайлов комиссияси аъзолари хизмат қилмоқда. Сайлов жараёнининг камчиликлардан холи ўтиши бевосита мутахассисларнинг касбий маҳоратига боғлиқ бўлганлиги туфайли, биз барча комиссия аъзоларини сайлов қонунчилигидаги янги ўзгаришлар ва овоз бериш қоидалари бўйича босқичма-босқич ўқитдик. Бу сайлов куни қонун талабларининг тўкис ҳамда бенуқсон ижро этилишига кафолат бўлади. Шунингдек, сайловчиларнинг конституциявий ҳуқуқлари ҳимоясини таъминлаш – бизнинг бевосита вазифамиз.

Шунга мувофиқ, ўзгача эҳтиёжлари бор, имконияти чекланган фуқароларимизнинг бемалол овоз беришига алоҳида эътибор қаратмоқдамиз. Барча сайлов участкалари зарур моддий-техника воситалари билан жиҳозланиб, зарур шароитлар яратилмоқда. Комиссиялар томонидан сайловчилар рўйхати пухталигини таъминлаш, номзодларни рўйхатга олиш ҳамда тарғибот жараёнини қонун доирасида уюштириш тадбирлари фаол юритилмоқда. 

Сайловнинг одил ва шаффоф ўтиши – сайлов комиссияларининг эмас, балки, бутун жамиятнинг обрўси. Шу боис, сиёсий партияларни, жамоат ташкилотларини, кузатувчилар ва оммавий ахборот воситаларини қонун доирасида сайлов жараёнида фаол иштирок этиб, унинг шаффофлигини таъминлашга чақираман.

Ҳар бир фуқаронинг танлови – мамлакатимиз келажагини белгилаб беради. Туркистон вилоятининг барча аҳолисини 23 август куни ўзларининг фуқаролик бурчини адо этиб, сайлов участкаларига келиб, овоз беришга чақираман. Фуқароларнинг ишончи ва эркин танловига асосланган одил сайлов – барқарор давлатимизнинг, тараққий этган жамиятнинг ва ёрқин келажагимизнинг мустаҳкам кафолати.