Қасим-Жўмарт Тўқаев Астана шаҳрида ўтказилаётган III Халқаро сунъий идрок олимпиадасининг тантанали очилиш маросимида табрик нутқи билан сўзга чиқди.

Ўз сўзида Давлат раҳбари Қозоғистон рақамли тараққиёт йўлини стратегик танлов сифатида белгилаганини таъкидлади.

– БМТнинг Электрон ҳукуматни ривожлантириш индексида Қозоғистон 193 давлат орасида 24-ўринни эгаллайди. Янги технологияларни жорий этишга тайёрлик даражаси бўйича мамлакатимиз Марказий Осиёда етакчи ҳисобланади. Биз сунъий идрок давлат бошқаруви, иқтисодиёт ва бизнеснинг муҳим воситасига айланган, жамият ҳаётининг барча соҳаларини қамраб олган ягона инновацион экотизимни барпо этмоқдамиз. Ўтган йилги халққа йўллаган Мактубимда уч йил ичида Қозоғистонни тўлақонли рақамли давлатга айлантириш вазифасини илгари сурган эдим. 2026 йилнинг Рақамлаштириш ва сунъий идрок йили деб эълон қилиниши айнан шу стратегик вазифани амалга оширишга қаратилган. Бундан ташқари, инновацияларга таянган мамлакат тараққиётининг асосий йўналиши 1 июль куни кучга кирган Қозоғистоннинг янги Конституциясида ҳам аниқ белгилаб қўйилган, – деди Президент.

Қасим-Жўмарт Тўқаев мамлакатимиз сифатли таълим ва иқтидорли ёшларни ҳар томонлама қўллаб-қувватлашга алоҳида эътибор қаратаётганини айтиб ўтди.

– Ўтган йили Пекин шаҳрида бўлиб ўтган Сунъий идрок олимпиадасида қозоғистонлик мактаб ўқувчилари учта олтин, битта кумуш ва учта бронза медалини қўлга киритди. Бу мамлакатимиз ҳақли равишда фахрланадиган ютуқ, ёшларимизнинг улкан заковат ва ижодий салоҳиятини яна бир бор тасдиқлайди. Фурсатдан фойдаланиб, иқтидорли ёшларимизни тарбиялаётган барча ўқитувчи ва мураббийларга самимий миннатдорчилик билдираман, – деди Давлат раҳбари.

Президент Олимпиада сунъий идрок соҳасидаги ёш тадқиқотчилар халқаро ҳамжамияти ривожига кучли туртки беришини таъкидлади.

– Илм-маърифат барча даврларда инсонларни бирлаштириб, инсониятни тараққиётнинг юксак чўққилари сари етаклаб келган. Сизнинг билимларингиз тиббиёт, таълим, экология ва бошқа ҳаётий муҳим соҳаларда янги ечимларга асос бўлиши мумкин. Балки айнан шу Олимпиадада оламни яхшироқ томонга ўзгартирадиган янги ғоя ва лойиҳалар дунёга келар, – деди Давлат раҳбари.

Шунингдек, Қасим-Жўмарт Тўқаев Олимпиада иштирокчиларига омад тилаб, ушбу муҳим тадбирни тайёрлашга ҳисса қўшган барчага самимий миннатдорчилик билдирди.

Очилиш маросимида, шунингдек, “Sinovation Ventures ва 01.ai” компаниялари бош директори Ли Кай Фу, Халқаро сунъий идрок олимпиадаси кенгаши раиси Елена Маринова, Қозоғистон Спорт дастурлаш федерацияси президенти Бағдат Мусин, “Kaspi.kz” ҳаммуассиси Михаил Ломтадзе ҳамда “Freedom Holding Corp.” бош ижроия директори Тимур Турлов ҳам нутқ сўзлади.

Тадбир доирасида Давлат раҳбари Халқаро олимпиаданинг тузилмаси билан таништирилди, шунингдек, унга танлов топшириқлари ва автоном роботнинг ишлаш жараёни намойиш этилди.

2-8 август кунлари Астана шаҳрида ўтаётган Халқаро сунъий идрок олимпиадасида 106 мамлакатдан 500 нафардан ортиқ иқтидорли мактаб ўқувчилари иштирок этмоқда. Мусобақалар доирасида қатнашчилар сунъий идрок шаклларини ишлаб чиқиш ва автоном роботларни дастурлаш бўйича беллашмоқда.